![Жаңа құралдың мүмкіндігі](/media/2024/01/17/photo_5190863432491061961_y.webp)
Ретиналды камера «Самұрық-Қазына» АҚ компаниялар тобының бірыңғай қайырымдылық операторы – «Samruk-Kazyna Trust» қорының қаржыландырумен сатып алынған. «Біз берген ретиналды камераның көмегімен енді жүздеген сәбиді мүгедектіктен құтқарып қалуға болады. Шала туған нәрестелердің көзін тексеріп, дәл уақытында диагноз қоюға мүмкіндік береді. Балалардың денсаулығына қатысты өңірлік жобаларды қолдау – маңызды басымдықтардың бірі», деп атап өтті «Samruk-Kazyna Trust» қорының бас директоры Альфия Адиева.
Павлодар облысында жыл сайын 10 мыңнан аса бала дүниеге келеді. Өңірде кейінгі бір жылда 763 сәби мерзімінен бұрын туған. Мұндай балалардың 40 пайызына «ретинопатия», яғни көру қабілетінің толық жоғалуына әкеп соқтыратын ауыр диагноз қойылады. Дәрігерлер перзентханада неонаталдық офтальмологияның қалыптасуына көмектескені үшін «Samruk-Kazyna Trust» қорына зор ризашылығын білдірді.
«Жаңа туған нәрестелердің ретинопатиясы» жобасын «Samruk-Kazyna Trust» қоры «Аяла» қайырымдылық қорымен бірлесіп жүзеге асырып жатыр. 2021 жылдың мамыр айынан 2023 жылдың сәуір айына дейінгі аралықта автоматты гипотермия жабдықтарының 6 аппараты арқылы 70-ке жуық жаңа туған нәресте құтқарылған.
Айтып өтейік, биыл сәуір айында «Қазақстан халқына» қоры «Шала туған нәрестелерге офтальмологиялық скрининг жүргізу және ретинопатиясын емдеуге арналған жабдықтармен медициналық ұйымдарды қамтамасыз ету» қайырымдылық бағдарламасы аясында Павлодар облыстық №1 перинаталдық орталығын жалпы сомасы 33,5 млн теңгеге диагностикалық асфералық линзалармен және офтальмологиялық лазермен жабдықтаған. Медициналық ұйымға жабдықтарды жеткізу мамандарды оқытумен қатар жүрді. Офтальмологиялық жабдық шала туған нәрестелердің көру қабілетінің бұзылуын (ретинопатия) анықтауға, уақтылы емдеуге және алдын алуға мүмкіндік береді.
Ақ желеңділердің айтуынша, Қазақстан өңірлеріндегі медициналық ұйымның көпшілігінде офтальмологиялық скринингке арналған жабдық жетіспейді. 2022 жылы елімізде дене салмағы 2 500 грамнан аз 20 мыңнан аса нәресте дүниеге келсе, соның 5 мыңға жуығында ретинопатияның даму қаупі жоғары болғаны тіркеліпті.
Павлодар облысы