Президент сұхбатында ішкі және сыртқы саясаттың, сондай-ақ әлеуметтік-экономикалық саясаттың басымдықтары егжей-тегжей баяндалды. Әсіресе мақалада әлеуметтік-экономикалық және қоғамдық-саяси реформаларды заңнамалық қамтамасыз ету басты орынға қойылды. Басты қызметі депутаттарға заң шығару бастамасын іске асыру, заң жобасын әзірлеу, заңнамалық тиімділігін талдауға көмек көрсетуге бағытталған Парламентаризм институты бүгінде Мемлекет басшысының реформаларын құқықтық қамтамасыз етуге көңіл бөліп отыр. Жиынның мақсаты да сол – осы саладағы әзірлемелер мен зерттеулердің нәтижелерін саралап, ортақ ой-пікірлерді талқылау.
Дөңгелек үстел жұмысын ашқан Парламентаризм институтының директоры Қанатбек Сафинов жиынның маңыздылығына тоқталды. «Басқосумыз Мемлекет басшысы Қасым-Жомарт Тоқаев бастамашылық еткен құқықтық реформаларды іс жүзінде іске асыруға арналып отыр. Бүгін айтылған сараптамалық талдаулар мен ортақ ой-ұсыныстар аса қажет. Себебі Президенттің «Egemen Qazaqstan» газетіне берген сұхбатында айтылған тезистер заң шығару үдерісінің негізі болуға тиіс», деді ол.
Парламент Мәжілісінің Аграрлық мәселелер жөніндегі комитетінің төрағасы, «Ауыл» партиясының төрағасы Серік Егізбаев Президенттің сұхбатын «Мемлекет пен қоғамның даму векторлары көрсетілген бағдарламалық мақала» деп атады. Осылай деген ол белгілі бір проблемалар байқалатын елдің аграрлық секторын дамытуға тоқталу қажеттігін жеткізді. Мысалы, «Ауыл» партиясы басшысының айтуынша, елдің ІЖӨ-де ауыл шаруашылығының үлесі небәрі 4,2 пайызды құрайды. Депутат импортталған жеміс-жидек көкөністерінің жергілікті нарықтағы үстемдігіне де қынжылыс білдірді. Салдарынан олар бәсекелестікке төтеп бере алмады және елдің оңтүстігіндегі жылыжай шаруашылықтары жабылды. Оның айтуынша, Үкіметтің шаруалар алдында субсидиялар бойынша 155 миллиард теңгеге берешегі бар. Жинақталған проблемаларды шешу үшін Парламент депутаттары, атап айтқанда, «Ауыл» партиясының фракциясы «Отбасы банкіне» ұқсас Агробанк туралы заң жобасына бастамашылық жасайды. Бұл шара аграрлық секторды кредиттеуді жақсартатынын атап өтіп: «Президент Қ.Тоқаев қыркүйек айында 2029 жылға қарай елдің ІЖӨ-ні екі есеге арттыру туралы міндет қойды. 2023 жылдың қорытындысы бойынша әлемдегі күрделі геосаяси жағдайға қарамастан, экономикамыз дамудың оң үрдісін сақтап отыр. Былтыр ІЖӨ 4,9 пайызға өсті. Нақты мәнде бұл – 75,5 триллион теңге. Экономиканың өсуін одан әрі көрсету үшін уақтылы қабылданған заңдар қажет. Бұл орайда Парламент пен Үкімет бірлесіп жұмыс істеп жатыр», деді депутат.
Ал Мәжіліс депутаты Мұрат Әбенов Мемлекет басшысының сұхбатында көрсетілген саяси реформалардың маңызды қорытындыларына тоқталды. «Қоғамда саяси реформалардың қаншалықты тиімді екендігі және одан әрі өзгерістер бола ма?» деген сұрақтар бұрыннан пісіп жетілген. Президент сұхбатында осы сұрақтарға жауап берді. Әрине, реформалар тез болмайды. Дегенмен бүгін біз реформалардың іске асырылып жатқанын көріп отырмыз. Мысалы, Парламент, мәслихаттар, әкімдер депутаттарын сайлау жүйесі жақсарды, Парламент пен Есеп беретін үкіметтің рөлі күшейтілді», деді депутат. Алайда заңнамалық жұмысты одан әрі жақсарту жұмыстары алға басуға тиіс. Бұл үшін Парламентте аналитикалық зерттеулер жүргізу, мамандарды тарту және тәжірибе алмасу үшін арнайы алаңдар құру маңызды болып отыр.
«Барлық пікірталас көшеде емес, Парламентте өтуі керек. Парламент барлық дамыған елдердегідей жұртшылықтың пікірін жеткізу және ең тиімді шешімдер қабылдау құралы болуға тиіс», деп қорытындылады сөзін депутат.
Қабылданатын заңдарды қоғам өзі талқылауға тиіс. Әйтпесе, өзгере беретін заңдар өміршең болмайды. Бұл орайда Парламентаризм институтының сарапшылары қоғам, жалпы ел үшін болашақ заңнамалық актілер мұқият ойластыру қажеттігін атап өтті. Сөз соңында Президенттік орталық директорының орынбасары Серік Сыдықов орталық отандық және шетелдік сарапшылар үшін елдің саяси және әлеуметтік-экономикалық өмірінің өзекті мәселелерін талқылайтын тұрақты диалог алаңына айналатынына сенім білдірді.
