Алматы музейінің бас қор сақтаушысы Раузия Орынғазықызының айтуынша, келушілер үшін музейде сақталған әрбір жәдігердің тарихы қызықты. «Музейлік бұйымдар көбіне қала тұрғындарының қорынан жинақталатын болса, этнографиялық экспозиция жеке тұлғалардан сатып алынған жәдігерлермен толығып отырады. Оған жыл сайын мемлекеттен арнайы қаржы қарастырылған. Кез келген жәдігерді сатып алмастан бұрын сараптамалық негіздеме қорытындысына сүйеніп, бағалау комиссиясының назарына алынады. Экспонаттарды бағалау кезінде нарықтағы құны сараланады. Кез келген экспозиция еліміздегі, сондай-ақ шетелдердегі көрме алаңдарында көрсетілетіндіктен, жәдігерлерді бағалау барысында оның тарихи мазмұнына да аса мән беріледі», дейді Раузия Орынғазықызы.
Бүгінде этнографиялық қорда шамамен 3 мыңнан астам жәдігер бар. Ең көне жәдігерлер ішінде 1894 жылы тігілген той шымылдығы қызыл қоңыр түсті матаға қармақ бізбен ақ, сары, қара, көк түсті жіптермен кестеленгендігімен көз тартады. Шымылдық қоғам қайраткері Медеу Пұсырманұлының туысы Бану Мырқасымоваға арналған. Мұнымен қоса ХХ ғасырдың басына тиесілі Қытайдың Алтай өңірінде қолданылған күміспен қапталып, алтынмен шайылған ер-тұрман, осы кезеңге тиесілі сирек кездесетін зергерлік бұйым – өңіржиек, құдағи жүзік, тағы да басқа жәдігерлер этнографиялық қордың ажарын ашып тұр.
Атақты батырымыз Бауыржан Момышұлы ұстаған жазу машинкасы, жазушы Әзілхан Нұршайықовтың жеке заттары, әйгілі әнші Роза Бағланованың сахналық киімі, «Дос-Мұқасан» ансамблінің аспаптары сияқты жеке бұйымдар туралы деректерді музейге келушілер қызыға тыңдайды. Әсіресе музейге жиі келетін оқушылар үшін әр жәдігердің тарихы тартымды.
Соңғы жылдары Алматы музейі мамандары шетелдік көрмелерге қатысып, ұлттық жәдігерлерді халықаралық кеңістікке таныстырып келеді. 2022 жылы Оңтүстік Корея мен Түркияда, ал былтыр Италияның Неаполь, Аустрияның Вена қаласында өткен этнографиялық және қазақтың ұлт аспаптары көрмесін ұйымдастырса, музей қызметкерлері ғылыми және ғылыми-практикалық конференцияларға қатысып, Францияның жетекші музейлерінде кәсіби біліктіліктерін арттырып қайтты.
АЛМАТЫ
