![Күншығыс елінің көмегі](/media/2024/01/22/foto.webp)
Қайтарымсыз грантты Талас аудандық орталық ауруханасының ұжымы жеңіп алды. Облыс орталығынан 100 шақырым қашықтықта жатқан аудандық аурухана қызметкерлері де енді жұмысын «Шөп тамыры» жобасы аясында үйлестірмек.
Күншығыс елінің Қазақстандағы Төтенше және өкілетті елшісі Ямада Джун, арнайы өкіл Комия Шимон және «Шөп тамыры» адам қауіпсіздігін қамтамасыз ету бойынша әлеуметтік жобаларға арналған қайтарымсыз көмек бағдарламасының үйлестірушілері Икэноуэ Ютаро мен Әлия Шыңғыспаева бастаған арнайы топ Қаратай қаласына арнайы келіп, жергілікті мамандарға жобаның маңыздылығын түсіндірді.
Үйлестірушілер келтірген дерекке сенсек, «Шөп тамыры» жобасы 27 жылдан бері үздіксіз қызмет атқарып жатыр. Басты мақсаты – үкіметтік емес ұйымдар мен медициналық және білім мекемелеріне қолдау көрсету арқылы халықтың аз қамтылған санатының өмір сүру сапасын жақсарту.
«Расында да, «Шөп тамыры» – адам қауіпсіздігін қамтамасыз ету бойынша әлеуметтік жобаларға арналған қайтарымсыз көмек бағдарламасы. Жоба шеңберінде медицина орталықтарға, экологиялық аймақтарға, оқу орындарына, мүмкіндігі шектеулі жандарға, балалар үйіне қолдан келгенше көмек көрсетіліп жатыр. Енді, міне, жоба аясында Талас аудандық және облыстық көпбейінді ауруханаға алынған тұрмыстық-техникалық жабдықтар пайдалануға беріліп отыр. Сондай-ақ бұл жолғы ерекшелік – медициналық қалдықтарды қауіпсіз жоюға арналған пештің орнатылуы», дейді мәртебелі меймандар жағдайды түсіндіріп.
Іс-шара барысында Жапониядан арнайы келген мамандар емдеу мекемесіне медициналық қалдықтарды кәдеге жаратуға арналған «Веста плюс» инсинератор пешін және тоңазытқыш пен кір жуу машиналарын орнатты. Бұл жұмыс техникалық жарақтандыру жөніндегі жоба аясында жүзеге асырылып отыр.
Облыс әкімдігі денсаулық сақтау басқармасының басшысы Жанар Оспанованың айтуынша, үздіксіз жұмыс атқарып келе жатқан жоба үйлестірушілерінің Жамбыл облысындағы ауданға назар аударғаны – құптарлық іс. Жергілікті мамандармен кездесу барысында күншығыс елінен келген қонақтар медицина қызметкерлерін толғандырған түрлі сұраққа нақты жауап берді. Сондай-ақ олар аудандық аурухана мен емхананы аралап, емдеу ұйымының әлеуетімен танысты.
Жамбыл облысы,
Талас ауданы