![Көнермейтін көркемдік](/media/2024/01/23/korme-55-1.webp)
«2024 жыл мерейтойлық атаулы күндермен есте қалмақ. Атап айтқанда, қаланың 90 жылдығы және Қарағанды Суретшілер одағының 60 жылдығы. Екі мерейлі датаның да маңызы зор. «Қарағандының көркемдік бастаулары» көрмесі – «Суретшілер одағы – 60» көрме циклінің алғашқысы. Көрмеден Қарағандыдағы бейнелеу өнерінің бастауында тұрған – Владимир Эйферт, Павел Фризеннің жұмыстары орын алған. Жалпы, көптеген суретшілер сол кезеңде қуғын-сүргінге ұшырап, тағдырдың жазуымен Қарағандыға келді. Дарынды суретшілер қаланы безендіруге үлес қосты. Портреттер салды, алғашқы өнер үйірмелерін ұйымдастырды. Қаланың көркемдік өмірі осы тұлғалардан тамыр тартады», – дейді мұражай директоры Бибігүл Құдабаева.
«Суретшілер одағы – 60» циклінің көрмесі жыл он екі ай бойы жалғасын таппақ.
Циклдің бірінші көрмесі – Қарағандының 50-60 жылдардағы бейнелеу өнеріне арналса, келесі экспозиция – 70-жылдарды қамтиды. Барлығы Қарағандының өткен тарихы, өндіріс, сондай-ақ қаланың дамуына үлес қосқан сол кездегі қайраткерлердің портреттерінен тұратын 60 жұмыс мұражай төрінде тұр.
Қарағандыда көрмелер 1964 жылы Суретшілер одағы құрылғанға дейін де өтті. Алғашқы көрме 1945 жылы ұйымдастырылса, ал 1956 жылы Қарағанды көркемөнер-өндірістік шеберханасы ашылды.
Көрменің фотоблогы негізінен 1953 жылдан Қарағандыда тұрған мүсінші-монументалист Николай Рыбецкийдің еңбектерінен жасақталған. Мүсіншінің қолтаңбасы Кеншілердің мәдениет сарайында, теміржол вокзалының ғимаратында қалғанын атап өту ләзім. Кескіндеме – бұрынғы суретшілердің суреттері. Олардың көпшілігі Отан соғысының қатысушылары – Виктор Крылов, Павел Реченский, Павел Андрюк, Петр Антоненко.
Көрменің мақтанышы – өңіріміздің тұңғыш қазақ суретшісі Райымқұл Есіркеев. Ол – Қарағанды Суретшілер одағының негізін қалаушылардың бірі. Анатолий Билык пен Юрий Гуммельдің еңбектері мүсін блогында орналасқан. Анатолий Билыктың жұмысы Украина мен Қазақстанның қалаларына көрік берді. Қарағандыда ол Юрий Гуммельмен бірлесіп, Кеңес Одағының Батырлары Нұркен Әбдіров пен Зоя Космодемьянскаяға ескерткіштер әзірлеген.
Көрме қаңтардың соңына дейін жалғасады.
Қарағанды облысы