Брифингте айтылғандай, елімізде электр энергиясын тұтыну 1,9 пайызға артқан. Ал түсім 251,9 млрд теңгені құрап отыр. «KEGOC» АҚ басқарма төрағасы Нәби Айтжановтың айтуынша, бұл көрсеткіш өсім негізінен реттелетін қызметтер бойынша көлемдер мен тарифтердің өсуі және операциялық шығындарды оңтайландыру есебінен қалыптасып отыр. Сонымен компаниядағы таза пайда өткен жылдың қорытындысымен 42,7 млрд теңге болса, бұл 2022 жылмен салыстырғанда 60 пайызға жоғары. Ол жылы компания пайдасы 26,7 млрд теңгені құраған еді. Бір қызығы, былтыр компанияның таза пайдасы 31,5 млрд теңге болады деп алдын ала болжанған еді. Бүгінде «KEGOC» АҚ болжанған қаржының өсуін ескеріп, екінші жартыжылдықта төленетін дивиденд көлемін ұлғайту мәселесін қарауда. Басқарма төрағасы мұндай шешім акционерлер үшін де, әлеуетті инвесторлар үшін де оң серпін болатынын атап өтті.
– Өткен жылдың екінші жарты жылдығының қорытындысы бойынша дивидендтер төлеу биыл екінші тоқсанында жүзеге асырады. Компанияда дивидендтік саясат жаңартылды, оған сәйкес, оны төлеуге таза пайданың кемінде 60 пайызы жұмсалады. «KEGOC» АҚ акционерлеріне дивидендтер жылына екі рет төленеді. Былтыр бірінші жартыжылдық бойынша компания 20,2 млрд теңге мөлшерінде дивидендтер төледі, – деді Н.Айтжанов.
Сондай-ақ компания жаңа жобаларды енгізу және қолданыстағы желілерді жаңғыртуды жалғастыра бермек. Ал былтырғы қорытынды бойынша Батыс энергия торабының электр желілерін күшейту бойынша ірі инвестициялық жобаның аяқталуын айтуға болады. Бұл жоба осы желілердің қызмет ету мерзімін 30 жылдан аса уақытқа ұзартты. Ал бүгінде Біртұтас электр энергетикалық жүйесінің Оңтүстік аймағын нығайту жобасы басталып кеткен. Жобада Жамбыл және Түркістан облыстарының 500 кВ-тық электр желілерін күшейту, оның ішінде үш қосалқы электр стансасын кеңейте отырып, 500 кВ-тық «Шу – Жамбыл – Шымкент» әуе желісін салу қарастырылыпты.
Айта кетейік, бүгінде компанияның балансында ұзындығы шамамен 27 мың шақырым, кернеуі 220-1150 кВ электр желілері мен трансформаторларының белгіленген қуаты 38,99 ГВА болатын 83 қосалқы электр стансасы бар.
