Еңбек және халықты әлеуметтік қорғау министрлігінің ұйымдастыруымен құрылған арнайы комиссия 4-24 қаңтар аралығында тергеу жүргізді. Аталған кезең ішінде Төтенше жағдайлар министрлігі Өнеркәсіптік қауіпсіздік комитеті төрағасының орынбасары Мұса Танабаевтың төрағалығымен комиссия мүшелері жобалық құжаттаманы зерделеп, тергеуге 4 сараптамалық ұйымды, оның ішінде Ресей Федерациясының сарапшысын тартқан. Мамандар алтын өндіруші кәсіпорынның куәгерлері мен лауазымды тұлғалары арасында сауалнама жүргізді. Сонымен қатар комиссия мүшелері шахтаға түсіп, оқиға орнын зерттеді.
«Біздің комиссия жан-жақты тергеу жүргізе отырып, барлық жайтты назарға алды. Комиссия тау-кен массасының құлауы салдарынан орын алған топтық жазатайым оқиғаның себептері ретінде келесілерді атайды:
– Жұмыс өндірісі қанағаттанарлықсыз деңгейде ұйымдастырылған;
«Майқайыңалтын» АҚ жауапты тұлғалары тарапынан тау-кен жұмыстарының қауіпсіз жүргізілуіне өндірістік бақылау тиісті түрде жүзеге асырылмаған;
– Блоктарды өңдеу кезінде қазбалардың құлау үдерісін бақылау тиісінше жүзеге асырылмаған деген қорытындыға келді.
Сонымен қатар шахта үстіндегі бос кеңістіктерге тиісті бақылау жүргізілмегені, жобалық құжаттамаға сәйкес әзірленген тазарту кеңістігіндегі бос жерлердің құлау ықтималдылығы бар екені назарға алынбағаны анықталды. Осының салдарынан кенеттен тау массасы құлап, жазатайым оқиға орын алған», деп хабарлады Төтенше жағдайлар министрлігі Өнеркәсіптік қауіпсіздік комитеті Павлодар облысы бойынша департаментінің басшысы Данияр Андасов.
Тергеу нәтижелері бойынша комиссия мүшелері жазатайым оқиғаның себептерін жою жөніндегі іс-шараларды және олардың орындалу мерзімдерін айқындады. Оның ішінде шахта директорының, бас инженердің, бас маркшейдердің, учаскелік маркшейдерлердің лауазымдық нұсқаулықтары өнеркәсіптік қауіпсіздік саласындағы заңнаманың талаптарын ескере отырып, қайта қаралмақ.
Д.Андасовтың айтуынша, бұдан басқа тау-кен қазбаларының өнеркәсіптік қауіпсіздік талаптарына сәйкестігіне егжей-тегжей тексеру жүргізіледі. Құлауы мүмкін аймақтарды және қауіпсіздік нормаларын қамтамасыз етуді ескере отырып, автокөлік қозғалысының маршруттары да әзірленеді.
Комиссия шешімі бойынша, топтық жазатайым оқиғаның орын алуына кінәлі ретінде 7 адам жауапты деп танылып отыр. Еңбек заңнамасына сәйкес тергеу материалдары құқық қорғау органдарына жіберілді.
Апат болған жерде авариялық-құтқару жұмыстары оқиға орын алған сәттен бастап ұдайы жүргізіліп жатыр. Бұған дейін ойық түбіне шағын экскаватор түсіріліп, геологиялық сканер арқылы белгіленген жерлерді қазу жұмыстары жалғасып жатыр.
«Қазіргі уақытта құтқарушылар экскаватордың жолына бөгеу болып тұрған салмағы 5 тоннадан асатын аса ірі емес тастарды пневмо-электр құралдарының көмегімен алып тастап жатыр. Құтқарушылар ауыр жағдайда жұмыс істеуде. Ойық шетіндегі топырақтың төмен сырғуы әлі де жалғасып жатыр. Барлық жұмысқа 147 адам, 45 техника жұмылдырылған», дейді Павлодар облысы төтенше жағдайлар департаменті бастығының орынбасары Олег Трещев.
Құтқарушылардың сөзіне сүйенсек, шұңқырдың астында бос кеңістіктер бар. Жұмыс істеп жатқандар кез келген сәтте әлгі ойықтарға түсіп кетуі әбден мүмкін. Сондықтан құтқарушылар аса сақтықпен қимылдап жатыр.
Айтпақшы, жер астына түсіп кеткен құтқарушыларды іздеуге Айгүл есімді көріпкелдің Майқайыңға келгені туралы ақпар тараған еді. Төтенше жағдай департаменті балгерді табылмай жатқан азаматтардың туыстары шақыртқанын хабарлады.
«Төтенше жағдайлар департаментінің бұл көріпкелдің келуіне ешқандай қатысы жоқ, қайғылы оқиға орнына ізделіп жатқан құтқарушылардың туыстары шақыртқан. Олардың бұл әрекетіне ешқандай ведомство кедергі келтіре алмайды. Көріпкел әйел туыстарымен бірге ойықтан қауіпсіз арақашықтықта тұрды. Құтқарушылар жүргізіп жатқан іздестіру-құтқару жұмыстарына жақындаған жоқ. Төтенше жағдай мамандары мен өзге де мамандар нұсқаулыққа сәйкес жұмыс істеп жатыр. Жұмыста топырақтың қозғалуын сканерлейтін техника, геологиялық сканер және металл іздегіш қолданылған. Сондай-ақ ойықтың түбінде кинологиялық топ іздестіру шараларын жүргізіп жатыр. Жұмыс бағытымыз арнайы аспаптардың көрсеткіштері негізінде түзетіліп отырады», деп хабарлады өңірлік төтенше жағдайлар департаментінің баспасөз қызметінен.
Павлодар облысы,
Баянауыл ауданы,
Майқайың кенті
