Аяқ астынан болған апат түннің жарымында елді алаңдатып-ақ тастады. Әуезов көшесі, 8а мекенжайында орналасқан бұл үй 2014 жылы пайдалануға берілген. Аталған үй әлі орталықтандырылған жылыту қазандығына мүлдем қосылмаған.
Жалпы, үйде 46 адам тұрады екен, жарылыс кезінде 35 адам болған. Жарақат алған бес адам үйінді арасынан құтқарылып, үш бала ауруханаға жедел жеткізілді. Құтқару жұмысына 139 адам, 32 техника жұмылдырылған.
– Үйінділер тазартылды. Жергілікті атқарушы органдар барлық қажетті техниканы уақтылы ұсынды, соның арқасында бес адам құтқарылды. Адамдар үйінділердің астында, плиталардың арасында қалып қойған. Крандар мен үш экскаватор тартылды. Бүгінгі күні Төтенше жағдайлар департаменті мен полиция қызметкерлері тексеру жүргізіп жатыр. Жарылыстың алдын ала себебі – газ баллонының дұрыс жұмыс істемеуі. Газ баллоны суықтан жылы бөлмеге кіргізілген. Болған оқиғаға кім кінәлі екенін құқық қорғау органдары анықтайды, – дейді облыстық Төтенше жағдайлар департаменті бастығының орынбасары Аманбек Бейсембаев.
Жоғарыда айта кеткеніміздей, газ баллоны жарылған пәтердің ғана емес, жалпы үйдің төбесі опырылып, басқа да пәтерлердің қабырғалары сөгілген. Қазір жергілікті сипаттағы төтенше жағдай жарияланды. Апатты үйдің тұрғындары туысқандарының үйіне орналастырылды.
– Зардап шеккен отбасыларға көмек көрсетіледі. Пәтер жалдап тұрамыз десе, оны да төлеп береміз. Қазір келтірілген шығынды бағалайтын комиссия құру жұмыстары жүріп жатыр. Әзірге үйде KazMIRR мамандарының көмегімен тексеріс жүріп жатыр. Сарапшылар үйді қалпына келтіру мүмкін еместігін айтса, жаңа үй салуды ойластырамыз, – дейді Бұқар жырау ауданының әкімі Абылай Сұлтанғали.
Апат кезінде көз жұмған марқұмдардың есімі анықталды. Ерлі-зайыпты Төлеген Тұрсынбекұлы мен Алма Омарқызының мезгілсіз дүниеден өткендігі естіген жанды есеңгіретті. Қарағанды облыстық Полиция департаменті өздерінің, әлеуметтік желідегі парақшаларында Бұқар жырау аудандық полиция басқармасының жедел уәкілі Дәурен Төлегенұлына ата-анасының мезгілсіз қайтыс болуына орай қайғысына ортақтасып, көңіл айтыпты.
– Облыстағы медициналық мекемелерге зардап шеккен бес адам түсті. Оның үшеуі – бала. Екі бала амбулаторлық емге шығарылды, бір бала облыстық балалар клиникалық ауруханасына жеткізілді. Екі ересек науқас Бұқар жырау аудандық ауруханасында стационарлық ем алып жатыр. Біреуінің денесін 80 пайыз күйік шалған. Жағдайы ауыр. Екіншісінің жағдайы қалыпты, 26 пайыз күйік шалған. Жарақат алған жандарға барлық медициналық көмек көрсетіліп отыр, – дейді облыстық Денсаулық сақтау басқармасының басшысы Бибігүл Төлегенова.
Қалай десек те қауіпсіздік қаперімізде болмай тұр. Былтыр тұрмыстық газ баллонының жарылуы бес рет қайталанған. Жазатайым оқиғалардың көпшілігі жоғарыдағы секілді тұрғын үйде оқыстан орын алып жатады. Газ баллоны отқа оранбай тұрып, ауа ағынымен жарылған күннің өзінде де адамға қаупі аса зор екен.
Төтенше жағдайлар департаментінің мамандары қатты ескертеді: газ баллонын көлік стансаларында толтыру аса қауіпті! Өйткені газ құтысына небәрі 80-85 пайыз көлемінде ғана толтырылғаны маңызды. Және ондай жерлерде газ жабдығының қауіпсіздігі тексерілмейтіні аян.
Сондықтан сақтанған абзал, ағайын!
Қарағанды облысы
Бұқар жырау ауданы
