Театр мен кинода қайталанбас кейіпкерлер галереясын қалыптастырып, тұңғыш кинорежиссер ретінде мәдени қазынамызды жауһар дүниелермен байытқан ұлт мақтанышының рухы ұлықталған кездесуге Қазақстанның Еңбек Ері, Қазақстан және КСРО Халық әртісі Асанәлі Әшімов қатысты.
Университет ұжымымен кездесуде әйгілі өнер иесі Сырға жасаған әр сапарынан ерекше әсер алатынын айтты. Бірақ бұл жолғы жүздесудің орны бөлек.
«Шәкен Айманов шын мәнінде, диапазоны кең дарын болды. Мен ол кісінің 3–4 фильміне түстім. Шәкеңдей талантқа шәкірт болғанымды тағдырдың сыйы деп санаймын. Ол кісі жан-жақты еді. Ағылшын театры мен киносының көрнекті тұлғасы Оливье Лоуренспен сыйластығы – бөлек әңгіменің жүгі. Ал ауылға бара қалса, қарттармен де солардың қатарындай сөйлесе беретін. Бұл университеттің Шәкеңнің мерейтойын атап өтуді оның атын иеленген «Қазақфильм» студиясынан бұрын бастап жатқанына таңғалып та, риза болып та отырмын», – деді Асанәлі Әшімов.
Кездесуде Шәкен Айманов түсірген фильмдерден әндер орындалды. Университет оқытушылары мен студенттер қадірлі қонаққа сауал қойып, әңгіме арқауы кино өнерінің бұрынғысы мен бүгінгісіне, жалпы қоғамдағы құндылықтарға ойысты.
Университет құрылтайшысы Бақберген Досмамбетов мәртебелі меймандарға алғысын жеткізді. Асанәлі Әшімовке «Болашақ» университетінің құрметті профессоры» мәртебелі атағын тапсырып, құрмет көрсетті.
ҚЫЗЫЛОРДА
