Егер балаңыз тіл алмайтын, қарсы шығатын шатақ боп өсіп жатса немесе сабаққа селқос, жаман жүріске үйір болса, демек оның ондай боп өсуінде ата-ананың оған қатысты абайсызда не ашумен айтқан теріс батасының да әсері бар.
Сол себепті балаларымызға ашуланғанда не ренжігенде тілімізге абай болуымыз керек. Бұған байланысты кітаптарда мынадай оқиға баян етіледі: Әбу Ханифаның шәкірттерінің бірі, хадисші әрі фақиһ ғұлама Абдулла ибн Мүбәракқа бір кісі келіп, баласының мінез-құлқының нашарлығына шағымданыпты. Абдулла ибн Мүбәрак одан сұрапты: "Оған теріс тілек айтып па едің?" Әкесі: "Иә", деп жауап беріпті. Сонда Абдулла ибн Мүбәрак оған: "Оны бұзған сенсің!" - деген екен, - деп жазылған "Бала тәрбиесіндегі 25 қателік" кітабында.
