Осы күннен бастап Арал қаласынан 20 шақырым қашықтықта жол патрульдік полициясының 6 инспекторы қауіпсіздік шараларына кірісіп кетті. Бүгінде аудан аумағында жолдан қалған 1 225 автокөлік пен 3 мыңға жуық жолаушы тұр. Осыған байланысты ауданда арнаулы штаб құрылып, жергілікті ерікті жастар, мекемелер және кәсіпкерлер жолаушыларға тегін ыстық тамақ ұйымдастыруға кірісіп кетті. Ұзақ жолға баламен шыққан жолаушылар Арал қаласындағы индустриалды-техникалық колледж жатақханасына орналастырылды. Медицина қызметкерлері күніне екі мезгіл жолаушыларды аралап, денсаулығын бақылап жүр.
Осындай аралау барысында 8 ақпан күні Тәжікстаннан Самараға сапар шеккен 28 жастағы Махфилоро Масруроваға медициналық көмек қажет екені анықталып, аяғы ауыр келіншек жедел жәрдеммен аудандық перзентханаға жеткізіліп, көмек көрсетілді. Қиналған жұртқа жәрдем ұйымдастырып жүрген азаматтар жол ашылғанша Махфилироны дәрігерлердің қарауында қалдыру туралы шешім қабылдап, ол ауруханаға жатқызылды.
Күре жолда қалып қойғандардың жағдайын облыс әкімі Нұрлыбек Нәлібаев ұдайы бақылап отыр. Аяқ асты болған жағдайдан абдырап қалған жолаушыларға Арал ауданының әкімі Аманжол Оңғарбаев келіп, жағдайымен танысты. Жергілікті әкімдік жол бойындағы қызмет көрсету кешендеріндегі азық-түлік пен тамақ бағасы қымбаттамауын бақылауға алды. Жолда қалғандардың дені – Өзбекстан, Тәжікстан, Қырғызстан елінің азаматтары. Олардың басындағы сәл қиындықты пайдаланып, қаржы қарпып қалуды көздемей, керісінше қолдан келген жәрдемін беруге ұмтылған жергілікті тұрғындардың бұл жақсылығы «Жолаушының үлеспеген еншісі бар» деген баяғы бабалар тәмсілінің әлі де мәнін жоймағанына көзімізді жеткізіп, жүрекке жылу ұялатты. Аудан әкімдігінің үйлестіруімен ерікті жастар, кәсіпкерлер мен мекемелер тегін ас та ұйымдастырып, жолаушылардың қиналып қалмауын барынша қадағалап отыр.
Аралмен көршілес Қазалы ауданындағы Ойынды елді мекені тұсындағы «Мирас» сервистік кешенінде 135 жүк көлігі мен 35 жеңіл автокөлік ошарылып тұр. Мұндағы көліктерде 200-ге жуық адам бар. Олардың жағдайын білуге барған аудан әкімі Мұхтар Оразбаев жол бойындағы кешен басшылығымен жолаушыларға тамақты арзан бағамен беруді келістірді. Ақпанның алапатынан жолда қалып қойғандарға қажетті көмек көрсетіліп, дәрі-дәрмек, ауызсу тегін үлестірілді. Балалы жолаушыларға кешеннің қонақүйінен тегін жатын орындар дайындалды.
Күндіз-түні көлік ағыны толастамайтын күре жол бойындағы «Мирас», «Арзан 1» кешендеріндегі қазіргі қарбалас қонақ күткен үйдің тірлігіне көбірек ұқсайды. Жұмылған жастар картоп-сәбізін аршып, әр жерде қазан-қазан палау асып, жолаушыларға тегін тамақ пен ыстық шай беріліп жатыр.
Жолда қалып қойғандардың жергілікті әкімдік пен қол ұшын созғандарға алғысы шексіз. Аралдағы колледж жатақханасына уақытша орын тепкен тәжік әйелі осы жағдайдан кейін жер бетінде жақсы адамдардың көптігіне сене бастағанын айтады. Осыны айтқанда оның көзінен мөлтілдеген жас көрінді. Бұл жарты әлемді жалғаған күре жолдың бойындағы жұрттың өздеріне көрсеткен алғаусыз пейіліне деген ризалық еді.
Боран басылып, жағдай тұрақталған соң автокөліктер жол полициясы бастауымен сапарын жалғастырады.
Қызылорда
