Ар адамға қандай қымбат болса, ақ орамалдың күші де одан кем болмаған, алмас қылышты әміршінің өзін тежеп, тізе бүктіргені туралы аңыз-әпсаналар шындығына күні бүгінге дейін кіреуке түскен емес.
Орамалды жаңа түскен келін тақса, уақыт өте келе балалы болып, сәбиді қырқынан шығарарда ауыл әжелері мен абысындары жиылып келіп, «ел анасы болдың» деп келіннің басына кестелі кимешек кигізген. Кимешек – әйелдің әлеуметтік мәртебесін, биіктігі мен салтанатын көрсеткен. Оның өзіндік тігу тәсілі, кию міндеті бар. Мәселен, кимешек иық, арқа, кеуде мен басты тұтас жауып тұрады. Тіпті республикамыздың әр өңірінде «бұрама жаулық», «иекше» деген әртүрлі атаумен де кездеседі. Кимешек ел мен жердің қоныстану ерекшелігіне қарай әртүрлі тәсілмен тігіледі. Солтүстік және Орталық Қазақстанда кимешектің алдыңғы жағы трапеция тәріздес болған. Қоңыраттар елінде төбесі толық тігілмей, алдынан тік бұрышты мата жібереді. Шығыс Қазақстан өңірінде кимешектің артқы жағы қысқалау болса, батыс аймақтарда бүрмелі кимешек болған. Оның алдыңғы жағы тура бұрышталып, төменгі ұзындығы кеудеге түсіп тұрған.
Қазіргі таңда көп киіле бермейтін кимешектің тарихы, тағылымы, өзіндік айырмашылығы бар. Осыны дәріптеу мақсатында Алматы облысының Мәдениет, архивтер және құжаттама басқармасына қарасты «Алматы облысының музейлер бірлестігі» аясында құрылған «Анаға құрмет» музейінде Халықаралық Орамал күніне орай «Анамнан қалған ақ жаулық» атты мерекелік мәдени-танымдық сән көрмесін өткізді. Көрмеге «ZARATA» ұлттық киімдер брендінің авторы Ләззат Исаханова, республикалық орамалдар конкурсының жүлдегері Маржан Әміртай, суретші Майса Ықылас, «Анаға құрмет» музейінің ұйымдастырушысы Бақыт Жатқынбайқызы және басқа да суретші-дизайнерлер қатысты
АЛМАТЫ
