Фото: Атырау облысының жедел штабы
«Қазгидромет» РМК Атырау облыстық филилалының гидрологиялық мониторинг дерегіне қарағанда, Жайық өзеніндегі су деңгейі күн сайын көтеріліп жатыр.
Мәселен, Индер ауданында кеше, 2 мамырда таңертеңгі сағат 08:00-де өзен арнасының суы 750 сантиметрге жеткен еді. Ал бүгін, 3 мамырда 788 сантиметрге жетті. Осылайша, бір тәулікте Жайық өзені +38 сантиметрге көтерілген.
Ал Махамбет ауданында кеше таңертең Жайықтың суы 795 сантиметр деңгейінде болатын. Бірақ кеше кешкі 20:00-де 8 метрден асып кетті. Бір тәуліктің ішінде бұл аудандағы судың көтерілу көрсеткіші +17 сантиметр құраған. Бүгін, 3 мамырда су деңгейі 812 сантиметрге жетті.
Атырау қаласында да Жайық өзенінің суы көтеріліп тұр. Кеше таңертеңнен бері су айдыны +12 сантиметрге ұлғайды. Қазір мұнайлы шаһардағы өзен арнасының деңгейі 471 сантиметрді құрады.
