Суреттерді түсірген – Ақәділ Рысмахан
Жаңа нысанның ашылу салтанатына өңір басшысы Ербол Қарашөкеев бастаған азаматтар арнайы қатысып, Құмшағал тұрғын алабы халқының қуанышына ортақтасып, ізгі тілегін арнады.
«Жергілікті халықты бұқаралық спортқа тартудың маңызы зор екені анық. Мемлекет басшысы да бұл мәселеге айрықша ден қойып отырғаны белгілі. Сондықтан да өңірде осы бағыт бойынша ауқымды жұмыстар атқарылып жатыр. Құмшағалда ашылған денешынықтыру-сауықтыру кешені – сол жұмысымыздың айқын бір дәлелі. Кешенге ағылып келетін жергілікті жастар арасынан Олимпиада ойындары мен Әлем чемпионатының, құрлықтық додалардың жеңімпаздары шығатынына сенемін. Құмшағал тұрғындарын жаңа нысанның ашылуымен шын жүректен құттықтаймын», деді Е.Қарашөкеев денешынықтыру-сауықтыру кешенінің ашылу салтанатында сөйлеген сөзінде.
Іс-шараға арнайы қатысқан еңбек ардагері Рахманбек Ұстаев құмшағалдықтар атынан сөз сөйлеп, жаңа кешеннің ашылу салтанатына арнайы қатысқан өңір басшысы Е.Қарашөкеевке ризашылығын жеткізіп, алғыс айтты.
Кейінгі жылдары өңірдің спорт саласын өркендету мақсатында қазынадан қомақты қаражат қарастырылып жатыр. Дерекке жүгінсек, өткен жылы 14,2 млрд теңге бөлініпті. Жергілікті биліктің қолдауын сезінген жамбылдық спортшылар өз кезегінде ауыз толтырып айтарлықтай табыстарға қол жеткізіп, жанкүйерлерді қуантып жатыр. Мәселен, таяуда ғана елорда төрінде өткен ел чемпионатында еркін күрес шеберлері көңіл көншітерліктей нәтиже көрсетіп, жалпыкомандалық есепті топ жарған еді.
Астана қаласында ұйымдастырылған ел чемпионатында 97 кг салмақ дәрежесінде топқа түскен Әлішер Ерғали финалда әлем чемпионы Ризабек Айтмұханды жеңіп чемпион атанса, 70 кг салмақ дәрежесінде белдескен Мейіржан Әшіров те жеңістің биік тұғырынан көрінді. Тағы үш балуан күміс жүлдеге қол жеткізсе, бір спортшы қола медаль иегері атанды.
«Құмшағал тұрғын алабында бой көтерген денешынықтыру-сауықтыру кешені – тұрғындар көптен күткен қуаныш. Бұл кешенде жергілікті азаматтармен бірге балалар мен жасөспірімдер де спортпен шұғылданып, саламатты өмір салтын ұстанатыны анық. Бір сөзбен айтқанда, жаңа кешен құмшағалдықтардың кәсіби спортпен де, бұқаралық спортпен де айналысуына зор мүмкіндік тудырып отыр», дейді Олимпиада ойындарының екі дүркін жүлдегері, даңқты дзюдошы Елдос Сметовтің алғашқы бапкері Ахмет Жұмағұл.
Екі қабатты жаңа спорт нысанында балалар мен жасөспірімдер денешынықтыру клубы құрылғанын айта кеткен жөн. Мұнда 7-17 жас аралығындағы жергілікті жасөспірімдер спорттың сегіз түрімен шұғылдана алады.
Дерекке сенсек, былтыр өңір бойынша 9 спорт кешені ашылған. Ал осы жылдың соңына дейін 13 нысанның құрылысы толықтай аяқталып, тұрғындардың игілігі үшін пайдалануға беріледі деп жоспарланып отыр. Қазіргі кезде 492 мыңнан аса жамбылдық немесе өңір халқының 40,3 пайызы бұқаралық спортқа тартылған.
Қалай десек те, өңір спортын дамыту мақсатында кейінгі жылдары айтарлықтай жұмыстар атқарылып жатқаны анық. Билік қолдауын сезінген жамбылдық спортшылар жақсы нәтижелермен қуантады деген сенім зор.
Жамбыл облысы
