Танымал тұлғаны еске алуға жиналған қауым біртуар ғалымның ғылымға, әдебиетке сіңірген еңбегі хақында ой толғады.
М.Әуезов атындағы Әдебиет және өнер институтында ұзақ жыл қызмет еткен Мырзабек Дүйсенов – көркем проза, сын, әдебиеттану салаларында бірдей еңбек еткен қарымды қаламгер. Ол кіші ғылыми, аға ғылыми қызметкерден Жамбылтану бөлімінің меңгерушісіне дейін жауапты қызмет атқарды. Әл-Фараби атындағы ҚазҰУ-да білім алған ғалым кезінде Мұхтар Әуезовтің жетекшілігімен аспирантураға қабылданған. Әбділдә Тәжібаев, Әзілхан Нұршайықовтай халқымыздың дара перзенттерімен де үзеңгілес болып, әдебиет майданында тер төкті.
Жиында Қазақстанның еңбек сіңірген қайраткерлері, жазушы Сұлтанәлі Балғабаев пен ғалым Серік Негимов Мырзабек Дүйсеновтің жайсаң мінезін, терең ізденісін еске алып, оның әдеби кәсіпке деген адалдығын, әріптеске деген мейірімін әңгімеледі. Ғалымның ғылыми қағидаты мен ұлт танымын көтерген деректі прозасын атап өтті.
Қазақстан Жазушылар одағы төрағасының орынбасары Бауыржан Жақып қазақ әдебиеттануының дамуына өлшеусіз еңбек сіңірген Зейнолла Қабдолов, Серік Қирабаев, Тұрсынбек Кәкішев секілді тұлғалардың қатарында Мырзабек Дүйсеновтің де тұрғанын айтты. Бүгінде ғалымның артында өшпес мұрасы, баға жетпес еңбектері қалды.
АЛМАТЫ
