Фото: Ашық дереккөз
Дереу өрт сөндірушілерге хабар берген Ұлттық ұлан әскери қызметкері отқа оранған пәтерде қарт әйелдің барын анықтап, көмекке ұмтылған.
«Түтінді көргеннен кейін кіреберіске асықтым. Жол бойында өрт сөндіру бригадасын шақырған едім. Кіреберістің есігі жабық болғандықтан, барлық пәтер нөмірлеріне қоңырау шалуға тура келді. Тұрғындардың бірі есікті тез аша қойды. Ішке бас сұққан сәтте қарт тұрғын паналаған пәтерді қою түтін тұмшалағанын байқадым. Пәтеріне енген соң қарияны қолыма алып, ашық терезе арқылы сыртта жиналып қалған адамдарға бердім. Сол аралықта өзім де көмірқышқыл газына тұншыға бастадым, тіпті есімнен танып қалуым да мүмкін еді. Абырой болғанда, өрт сөндірушілер сыртқа аман шығуыма көмектесті. Бұл үшін мен оларға ризамын», дейді сержант Болат Ысқақов.
Кейін өрт шыққан жерге Қостанай облысының Төтенше жағдайлар департаментінің қызметкерлері келіп, жедел шаралар қабылдады. Тұрғындар ғимараттан эвакуацияланды. Барлығы 15 адам құтқарылды, олардың арасында 8 бала бар. 23 адам эвакуацияланды. Құрбандар мен зардап шеккендер жоқ.
Өрттің себептері анықталып жатыр. Алдын-ала болжам бойынша, өрт жылытқыштың жиһазға жақын орналасуынан тұтанған.
