Ғалымдар жасаған биотыңайтқыш сұйық және ұнтақ күйінде өндіріске шығады. Мұндай биологиялық тыңайтқыш дақылдардың өнімін арттырып, қоршаған ортаға ешқандай залал келтірмейді.
«Қазір топырақтың тұздануы әлемде экологиялық өзекті мәселеге айналып отыр. Оның салдары адам денсаулығына, өсімдіктің өнімділігіне кері әсерін тигізеді. Соны жою үшін түрлі химиялық әдіс қолданылады. Бұл әдіс тиімді нәтиже көрсеткенімен, қоршаған ортаға зиян. Жаңа биологиялық өнім тек экономикалық тұрғыдан емес, сонымен қатар ауыл шаруашылығы саласы үшін қауіпсіз әрі тиімді. Тұзданған және қарапайым топырақта микроорганизмдердің қалыпты микрофлорасы болады. Біз сол микрофлораны бөліп алып, соның көмегімен төменгі сапалы көмірді биосолюбилизациялау арқылы гуминді зат бөліп алып, алынған өнімді тыңайтқыш ретінде енгіземіз. Кейін тыңайтқышты тұзданған топырақпен араластырғанда оң нәтижесін көруге болады. Демек топырақтағы тұздың концентрациясы азайып, қалыпты нормаға келеді», дейді Қазақ ұлттық университетінің кіші ғылыми қызметкері Бекзат Каменов.
Бүгінде патент алу және коммерцияландыру жұмысымен айналысып жатқан ғалымдар алдағы уақытта қоршаған ортаға зиянсыз, дақылдың өнімін өсіруге ықпал ететін жаңа өнімді нарыққа шығаруды жоспарлап отыр.
АЛМАТЫ
