Мәдениет және ақпарат министрлігі Қолжазбалар және сирек кітаптар ұлттық орталығы мен Түрікменстанның Қазақстандағы елшілігінің ұйымдастыруымен Түрікменстан әдебиетінің классигі, ақын, философ Мақтымқұлының 300 жылдық мерейтойына арналған салтанатты кеш өтті.
Іс-шараға Мәдениет және ақпарат министрлігі, Архив, құжаттама және кітап ісі комитеті төрағасының орынбасары Роллан Құспан, Өзбекстан, Түрікменстан, Тәжікстан, Әзербайжан, Беларусь, Қырғызстан республикаларының Төтенше және өкілетті елшілері, Парламент Мәжілісінің депутаттары және зиялы қауым өкілдері қатысты. Академик Бауыржан Омарұлы, профессорлар Өмірзақ Озғанбай, Амантай Шәріп, Серік Негимов баяндама жасады.
Архив, құжаттама және кітап ісі комитеті төрағасының орынбасары Роллан Құспан өз сөзінде Мақтымқұлының 300 жылдық мерейтойы ЮНЕСКО-ның 2024-2025 жылдарға арналған мерейтойлық күндер тізбегіне енгізілгенін атап өтті.
– Айтулы мереке қазақ халқы үшін де айтулы іс-шара ретінде аталып өтуі ерекше маңызға ие. Қазақ әдебиетінің шоқтығы биік тұлғаларымен үндес, пікірлес сарыны және түркі халықтарына ортақ мұрасының өміршеңдігімен құнды. Мақтымқұлының мұрасы халқымен, түркі халықтарымен бірге жасай береді, – деді Роллан Құспан.
Түрікменстанның Қазақстандағы елшісі Батыр Реджепов ақынның шығармашылығы кейінгі кезеңдегі түрікмен поэзиясының дамуына едәуір әсер еткенін жеткізді.
– Оның өлеңдері мен шағын поэмалары халық шығармашылығына тілі бойынша және поэтикалық тәсілдерімен жақын болып, халықтың жадында бүгінгі күнге дейін ұрпақтар үшін даналық пен поэтикалық шабыт көзі ретінде сақталған. Түркі халқына ортақ тұлғаның өміршең шығармашылығын насихаттауға назар аударып, айтулы мерейтойды атап өтуге қолдау білдірген қазақстандықтарға алғыс білдіремін, – деген елші Қолжазбалар және сирек кітаптар ұлттық орталығының қорына ақынның түрікмен тілінен аударған «Мақтымқұлы Пырағы» таңдамалы өлеңдерін табыс етті.
Жиын аясында Түрікменстанның актері Батыр Чарыев «Түрікмен» өлеңін оқыса, «Қазақконцерттің» әртісі Дінислам Жайлаубаев Мақтымқұлының ел арасына кең жайылған термесін орындады.
Іс-шарада Мақтымқұлының шығармашылығына арналған көрме ашылып, ақынның түпнұсқадағы қолжазбалары мен өлең жинақтары таныстырылды.
