Аймақтар • 25 Ақпан, 2024

Әлеуметтік дүкен

108 рет
көрсетілді
2 мин
оқу үшін

Талдықорғанда облыс әкімдігінің бас­тамасымен қолжетімді үшінші дүкен ашылды. Кең әрі жайлы сауда орнында облыстың тұрақтандыру қорының және «кері схемамен» жұмыс істейтін өндірушілердің тауары 15-20 пайыз төмен бағамен ұсынылады.

Әлеуметтік дүкен

Суретті түсірген – Дмитрий Ерофеев

Дүкенде тауардың түрі көп, соның ішінде тұр­мыс­тық химия, сусын және басқа да әлеу­мет­тік маңызы бар 18 түрлі азық-түлік өнімі на­рықтағыдан 15-20% төмен бағада сатылады. Мысалы, I санаттағы жұмыртқаның он­дығы – 445 теңгеден, 1 литр сұйық май – 510 теңге, 1 кг күріш – 340 теңге, 1 кг картоп – 110 теңге, 1 кг пияз – 70 теңге, 1 кг сәбіз – 140 теңге.

Нысанның ашылуында сөз сөйлеген Тал­ды­қорған қаласы әкімінің орынбасары Рүстем Бершімбеков әлеуметтік дүкендердің ашылуы облыс әкімдігінің бастамасымен, Тал­дықорған қаласы әкімдігі мен «Жетісу» әлеуметтік-кәсіп­керлік корпорацияның бір­лесіп қолға алған іс-шарасы екенін атап өтті.

«Мұндағы сөрелерге тауарлар делдалсыз, өндіру­ші­лер­ден қосымша шығынсыз тікелей жеткізіледі. Бұл дү­кен­дер­дің бәрі ӘКК-нің қар­жы­ландыруында, сондық­тан олар­дың тауары нарық­та­ғыдан төмен бағада сатылады», деді Р.Бершімбеков.

Осы дүкендердің жұмысы­на қатысты сатып алушылар да өз пікірін білдірді.

«Мұнда жарма, көкөніс пен жұмыртқа алу­ға келдім. Шынында да, нарықтағыдан төмен бағада екен. Дүкен қолайлы жерде, аял­да­маға жақын орналасқан. Ауданы­мызда егде жас­та­ғы­лар көп тұрады. Енді бізге орталық базарға жиі барудың қажеті бол­майды», деді Гүлгүл Қанапиянова.

Өңір әкімінің баспасөз қызметінің мәлі­ме­тін­ше, облыста «Жетісу» ӘКК-нің 6 әлеуметтік нүктесі бар. Оның ішінде 2 әлеуметтік дүкен Талдықорғанда, бірі Үштөбе қаласында орна­ласқан. Сол сияқты коммуналдық және әлеу­мет­тік базарлар мен «Көк­базар» сауда үйінде сауда нүктелері жұмыс істейді. ӘКК өкілдерінің айтуынша, жұмыс мұнымен тоқтамайды. Облыс әкімінің тапсырмасына сәйкес бұдан әрі де облыс орталығының халық тығыз орналасқан шағын аудандарында осындай форматтағы әлеуметтік дүкендер ашыла бермек.

 

Жетісу облысы