Облыс әкімі Нұрлыбек Нәлібаев форум жұмысына сәттілік тілеп, қоғамдағы аналардың рөлін ерекше атап өтті.
«Президент жанындағы әйелдер істері және отбасылық-демографиялық саясат жөніндегі Ұлттық комиссиямен бірлесіп, өткен жылдың қараша айында алғаш рет «Анаға тағзым» республикалық форумын ұйымдастырдық. Тағылымды іс-шара қонақтары сол сәтте бұл жиынды дәстүрлі түрде өткізуді ұсынған еді. Бүгінгі форум Ұлттық комиссиямен бірлесіп ұйымдастырылып отыр. Шаңырағында береке ұйытып, қоғамдық-саяси үдерістерге белсене қатысатын әйел-ананы ардақтау, тарихтағы ұлы аналарының ізгі жолын дәріптеп, жас ұрпаққа рухани-адамгершілік тәрбие беру, өткеннің тағылымын жаңа дәуірдің талабымен сабақтастырған бүгінгі қазақ әйелінің үлгілі бейнесін қалыптастыруды көздеген форум жұмысына сәттілік тілейміз», деді аймақ басшысы.
Мәдениет және ақпарат министрі, Президент жанындағы әйелдер істері және отбасылық-демографиялық саясат жөніндегі Ұлттық комиссия төрағасы Аида Балаева әйел-аналардың ел дамуы мен өркендеуіне қосқан үлкен үлесін айрықша атап өтті. Олардың қоғамдағы орнын айқындап, құқықтары мен мүмкіндіктерін кеңейту мемлекеттік саясаттың басым бағыты болып қала беретінін айтты. Бүгінде отбасы және гендерлік теңдік институтын дамытудың қазақстандық моделі айқындалған 2030 жылға дейінгі Тұжырымдаманы іске асыру жалғасып келеді.
Жиында Қазақстанның еңбек сіңірген қайраткері, тіл жанашыры Асылы Осман, Қазақстан халқы Ассамблеясы жанындағы республикалық Аналар кеңесінің төрағасы Назипа Шанаи, республикалық «Әкелер одағы» қоғамдық бірлестігінің төрағасы Мақсұтбек Айтмағанбет, «Amanat» партиясы әйелдер қанатының төрағасы Шолпан Каринова және белгілі тележүргізушілер Қымбат Досжан, Дана Нұржігітова, Қазақстанның еңбек сіңірген қайраткерлері Елена Әбдіхалықова, Елмұра Жаңабергенова, Жеңіс Ысқақова, Ұлжан Байбосынова сөз сөйледі.
Форумда Аида Балаева отбасы құндылықтарын үнемі насихаттап, әйелдер істері және отбасылық-демографиялық саясатты белсенді іске асыруға атсалысқан қыз-келіншектерді марапаттады.
Өңірде облыс әкімі жанындағы әйелдер істері және отбасылық-демографиялық саясат жөніндегі комиссия мүшелері барлық аудандарды аралап, тұрғындармен кездеседі. Психологтердің қатысуымен тренингтер өткізді. Аналарды қолдау және адал еңбекті насихаттау мақсатында Ауыл әйелдерінің форумы ұйымдастырылды. Әкелер одағы құрылып, ер бала тәрбиесіне қатысты жүйелі шаралар атқарылып келеді. Барлық мектепте Әкелер, Аналар кеңестері белсенді жұмыс істеп, Ұлттық комиссияның тапсырмасына сәйкес облыс әкімінің отбасы және әйелдер істері жөніндегі уәкілі тағайындалды.
Қызылорда
