Мемлекеттік тілде еркін сөйлеп, қазақтың салт-дәстүр, әдет-ғұрпына құрметпен қарайтын Вера Владимирқызын білетіндер оны қазақ қызынан кем көрмейді. Мектеп жасынан іс-шаралардың көшбасынан көріне білген Вера қай істе де белсенділігімен танылған. Халық билерін билеп, көрермен ықыласына бөленген кездері аз емес. Кітапқұмарлығы да айналасына көзіқарақты достар жиюына ықпал еткен. Қазіргі кезде қаржы, экономика, психологиялық кітаптарды оқып, ойын жетілдірумен, білімін-білігін ұштаумен айналысып келеді. Бос уақытында ағылшын тілін игеруге де ден қоя бастаған жастың ойы ұшқыр, талабы таудай. Биыл қаңтар айынан бастап Алматы облысының ішкі саясат басқармасы «Қоғамдық келісім және даму орталығы» КММ-де жұмыс істейді.
«Үйімізде туған тілімізде сөйлессек те, көпшілік орындарда, көшеде ел-жұртпен қазақ тілінде сөйлесу әдетке айналған. Бұл – менің қасиетті топырағында дүниеге келіп, тіршілік етіп отырған пейілі даладай қазақ елі мен жеріне құрметім», деген Вера бала кезден Наурыз мерекесін асыға күтетінін айтады.
«Наурыз – менің сүйікті мерекелерімнің бірі. Наурыз көже жеті түрлі дәннің қоспасынан әзірленетінін әлі естен шығарған жоқпын. Наурыз мерекесі келгенде шаңырағымызда міндетті түрде Наурызкөже жасалады. Ресейде тұратын жақын туысқанымыз бар. Солар осыдан жеті жыл бұрын бізге наурыз мерекесі қарсаңында қонаққа келген болатын. Сол кезде анам наурызкөже жасаған еді, оларға наурыз көже қатты ұнады, тіпті анамнан ертесіне көбірек жасап беруді өтінді», деп ағынан жарылған Вера ауылдастары мен ұстаздарына айрықша лебізін білдірді.
– Қазақтың тілін, салт-дәстүрін үйренуіме үлес қосқандары үшін ұстаздарым мен жанымдағы жақсы адамдарға мың алғыс айтамын. Кең байтақ елде туып-өскенімді мақтан етемін, қонақжай қасиетін құрметтеймін. «Көппен көрген – ұлы той» демекші, ауылда өскенімнің арқасында көппен ортақ тіл табыса білдім. «Батамен ел көгерер, жаңбырмен жер көгерер» деп бекер айтпаған. Бата алсам, бақытқа бөленгендей боламын. Адал еңбек етіп, бата алып жүрген адамның жолы ашық, мерейі үстем болады. Бұл менің – басты қағидам, – дейді Вера. – Болашаққа жол бастап, жөн сілтейтін бүгінгі – жастар. Сондықтан еліміздің әрбір тұрғыны келешегіміздің жарқын болуын ойлап, әрі қарай да бір шаңырақ астында тату-тәтті өмір сүріп, тәуелсіз елімізді нығайтуға үлес қоса беруіміз керек.
Алматы облысында бүгінде 105 этнос өкілі тұрады. Өңірде 26 этномәдени орталық жұмыс істейді. Сонымен қатар Алматы облыстық Қазақстан халқы Ассамблеясы жанында ғылыми-сараптамалық топ, ақсақалдар алқасы, аналар кеңесі, медиация кеңесі, жетекші журналистер тобы, кәсіпкерлер қауымдастығы және «Ассамблея жастары» РҚБ өкілдігі жұмыс атқарады. Әрбір құрылым қоғамдық келісімді қамтамасыз етуге, Қазақстан халқы Ассамблеясының саяси және азаматтық институт ретіндегі қоғамның бірлігін, толеранттылықты нығайтудағы, этносаралық келісімді сақтаудағы рөлін күшейтуге өз үлестерін қосады.
Алматы облысы
