Сурет ашық дереккөзден алынды
Мысалы, өткен жылы Алматыда мүгедектігі бар 433 адам инновациялық техникалық оңалту құралдарымен қамтамасыз етілген. Яғни 2023 жылғы мемлекеттік сатып алу арқылы 150 протез, 200 арба, 76 сөйлеу процессоры мен инновациялық 7 есту аппараты алынды.
Осындай инновациялық протездің біреуіне қолы жеткен паралимпиадашы Джанэт Жакиеннің ендігі жерде қаланы оңай аралап, пауэрлифтингпен айналысуды жалғастырып жатқаны қуантады.
«Мен 1976 жылдан бастап протезбен жүре бастағанда жасанды аяқтар ауыр әрі ыңғайсыз болатын. Уақыт өте келе олар жеңіл болып шығарыла бастады да, бұл өмірді едәуір жеңілдетіп, икемді болды. Алайда, өкінішке қарай, мұндай протездер спорттық жүктемелерге шыдас бере алмайтын. Қазіргі заманауи протездер – жүруге де, жаттығуға да ыңғайлы. Арнайы бекітетін құлыптары мен силикон қақпақтары бар», дейді паралимпиадашы.
Осы мақсатта биыл Алматыда жергілікті бюджеттен 1 млрд 396 млн 550 мың теңге сомасында мүгедектігі бар 288 адамды инновациялық техникалық құралдарымен қамтамасыз ету үшін қаражат бөлініп отыр.
Сапа басты орында болғандықтан, мегаполис басшысы Ерболат Досаев қала тұрғындарымен кездескен кезде оңалту құралдарын жеткізушілерді таңдауда мемлекеттік сатып алу туралы заңға енген өзгерістерге қатысты түсініктеме берді. Себебі Наурызбай ауданы тұрғындарының бірі қала әкімімен кездесу барысында Жол картасы бағдарламасы арқылы былтыр көпфункционалды арба алғанын, сол арқылы баласының талай әжеті өтеліп, басын, денесін, аяғын ұстап тұра алатынын, емдік әсері де бар екенін алғыс сезіммен жеткізді. «Бұл баламның оңалуына аса қажетті, сапалы гаджет екен. Жеткізушілерді таңдаған кезде тауарлар мен қызметтердің осындай сапасына мән беруді сұрағым келеді», деген еді ол.
Қала тұрғынының шынайы алғысына ризашылығын білдірген Алматы әкімі: «Балаларымызға оңалту құралдарын сатып алу тәсілдерін қайта қарастырдық. Ата-аналарға ыңғайлы әрі шипасы бар заманауи арбаларды сатып алуды қадағалап отырмыз. Оған қоса протездерді ауыстырдық, есту қабілеті нашар балаларды оңалту мәселелерін қайта қарастырдық», деді.
Е.Досаев былтыр осы мақсатқа 1,3 млрд теңге бөлініп, оңалту құралдарымен 433 адам қамтылғанын, биыл шамамен осыншама сома бөлінгенін жеткізді.
Алматы қаласының әкімі жеткізушілерді таңдауда сапа өлшемі бойынша Еңбек және әлеуметтік қорғау министрлігіне ұсыныстар түсіргенін алға тарта келе: «Қазір мемлекеттік сатып алу аясында бізге баға жағынан санасуға тура келеді, бірақ министрлік бізді қолдайды деп үміттенемін және балаларымыз бен мүмкіндігі шектеулі ересектер үшін ең жақсысын сатып алуға тырысамыз», деді.
АЛМАТЫ
