Осы орайда «Касперский зертханасы» өзінің технологиялық әріптесі – «ТОНК» компаниялар тобымен күш біріктіре отырып, Орталық Азия мен Моңғолия аймағында KasperskyOS операциялық жүйесі мен оның негізінде кибериммунды жұқа клиентті жетілдіру жұмыстарын жалғастырып жатқан-ды. Ақпан айының аяғында «Цифрлық Қырғызстан 2024» форумында Kaspersky Thin Client 2.0 нұсқасындағы TONK TN1200 кибериммунды компьютері жұрт назарына ұсынылды.
«TONK TN1200 жұқа клиенті – бұл кәсіпорынның деректерімен, қосымшаларымен жұмыс істеу үшін желіге қосылатын шағын есептеуіш ресурстары бар, өзіміз білетін үйреншікті компьютерлердің жеңіл нұсқасы. Барлық жұмыс үдерісі, соның ішінде деректерді сақтау, сыртқы серверлерге тасымалданады. Яғни KasperskyOS базасында Kaspersky Thin Client шешімдерін біріктіру кибериммунмен қамтамасыз етпек, басқа тілмен айтқанда, «туа салысымен» кибершабуылдан қорғайды.
Осыған орай, елімізде орналасқан «Касперский зертханасы» өңірлік кеңсесінің өкілдері де қанатқақты жобаны жүргізу үшін арнайы оқытудан өткен.
«Біз аймақтағылардың, әсіресе қаржы секторының кибериммунды қорғаныс пен шешімнің жаңа нұсқасына қызығушылық танытып жатқанын көріп отырмыз. Біздің аймақтағы банктер өнім туралы сауалдар қойып, оны көрсету үшін мамандарымызды белсенді түрде тартып жатыр», – дейді Қазақстан, Орталық Азия мен Моңғолиядағы «Касперский Зертханасының» басқарушы директоры Валерий Зубанов.
Ақпараттық қауіпсіздік саласында жұмыс істейтін компаниялар да күн сайын жаңа қорғаныс технологияларын әзірлеп жатқанымен, өкінішке қарай, көп жағдайда олар қаскөйлерді өкшелеп қана келе жатыр. Ал кибериммундық деп те аталатын бастапқы қауіпсіз (Secure-by-Design) АТ-жүйелері мен құрылғыларын жасау өршіп тұрған кибершабуылдар мәселесін түбегейлі шешіп, ақпараттық қауіпсіздіктің келбетін түпкілікті өзгертпек.
АЛМАТЫ
