Жаз шыға Алматы-Екатеринбург тасжолында тыным жоқ. Бұл күре жолдан төбесіне қайық қаңтарып алған көлікті көп кездестіресіз. Бәрі Балқашты бетке алған. Елдің көбі табан күйдіретін құмы мен дертке дауа тұзды суын аңсап, ағылады жан-жақтан.
Туризмді жетілдіру үшін инфрақұрылымның, оның ішінде жолдың сайрап жатқаны аса маңызды. Ұзаққа созылған Қарағанды – Балқаш тасжолының құрылысы да биыл қара күзге, қарашаға дейін аяқталады. «Дегенмен автобанның бір жақ жолағы ашылып, Балқашқа апаратын жол жақсарды», дейді туристердің көбі.
Жоғарыда атап өткеніміздей, биыл көл жағасында жеті демалыс аймағы салынады. Мұндағы орын 219 туриске шақталмақ.
– Балқаш – туризмнің ошағы. Өңірімізге жан-жақтан, сырт елден туристер ағылады. Қаладағы көл жағажайын көркейту жұмыстары әлі де жалғасын тауып жатыр. Туристік мүмкіншілігі артып келеді. Қала экономикасына былтыр құйылган инвестицияны одан арғы жылмен салыстырсақ, 9,2 млрд теңгеге артып, 67,5 млрд теңгеге жеткен. Болжам бойынша биылғы көрсеткіш бұдан да жоғары болып, 69 млрд теңгеге дейін өседі деп жоспарлаудамыз. Былтыр Ақтоғай ауданы аумағының бір бөлігі Балқашқа қосылып, туризмді дамытуға жаңа мүмкіндік ашылды. Жаңадан салынатын жеті демалыс аймағының құны 1,450 млрд теңгені құрайды, – дейді Балқаш қаласының әкімі Сапар Сатаев.
Иә, былтыр Ақтоғай ауданына қараған Шұбартүбек, Тораңғалық кенті Балқаш қаласына әкімшілік-аумақтық түрде қосылған еді. Аумағы – 8 744 га. Екеуі де – Балқаш көлінің жағалауында орналасқан, тіршілігі қыз-қыз қайнаған туристік аймақ. Мұнда 20 қонақүй мен 54 демалыс аймағы жұмыс істейді. Яғни Тораңғалықта – 514 нөмір, Шұбартүбекте 451 нөмір бар. Шаһар басшысы әлі де көл жағасында 120 га бос жер учаскесі бар екенін айтады. Биыл бұл учаскелер аукцион арқылы берілмек. Былтыр жағажайды жаңғырту бойынша жұмыстар қолға алынған еді. Қаладағы жағажайды абаттандыру жұмыстары биыл аяқталмақ. Бұған қоса Тораңғылық пен Шұбартүбекте су құбырларын салу бойынша жобаның жобалау-сметалық құжаттамасы әзір. Туристердің қауіпсіздігін де назардан қалыс қалдырып отырған жоқ. Осы мақсатта былтыр Шұбартүбек кентінде полиция және төтенше жағдайлар қызметкерлерінің бекеттері қойылды. Биыл дәл осындай нысандарды Тораңғалық кенті мен «Бертіс» шығанағы ауданында орнатуды жоспарлап отыр. Және бейнебақылау жүйесін күшейтпек.
– Мемлекет басшысының тапсырмасы негізінде Балқаш өңірінің көлік инфрақұрылымын дамыту жұмыстары басталды. 2022 жылы Балқаш қаласының әуежайы коммуналдық меншікке қабылданды. Енді оны үш жоба шеңберінде кешенді қайта құру жоспарланып отыр. «Ұшақ жолағын (РД-2) және әуежай перронын қайта жаңарту», «Әуежай ғимаратын қайта құру», «Арнайы көлік қызметі ғимаратының құрылысы» секілді жобалар бар. Өткен жылы Ақшағыл кентінде (Рембаза) Көкше теңіздің жағалауындағы «Балқаш Tourfest – 2023» фестивалі ұйымдастырылды. Екі күнге жалғасқан жағажайдағы жайдарлы сәттер туризмнің тынысын аша түсуге ықпал етеді. Мұндай фестивальдің алғаш рет өткенін айта кеткеніміз жөн. Бұл – эпидахуалдық үзілістен кейін туристік маусым уақытында ұйымдастырылған тұңғыш ауқымды іс-шара. Мұны дәстүрге айналдыру арқылы аймағымыздағы туризмді дамытамыз деген сенімдеміз, – дейді қала әкімі.
Өңірдегі туризм саласын осындай қадамдар арқылы алға жетелеп, келер жылға дейін туристер санын кемінде 4 есеге өсіруді ойластырып отыр.
Қарағанды облысы
