Суретті түсірген – Александр МАРЧЕНКО
Бірден айтайық, өндіріске қажетті шикізатты шетелден сатып алады. Арнайы қоспаны «Hyundai», «Kia» көліктері үшін Нидерланд пен Оңтүстік Кореядан әкеледі. Олардың өкілі кәсіпорында жарты жылда бір болып тұрады. Сапасын салыстырады, сынамаларды тексереді. Шетелдік сарапшылар кей жағдайда кейбір сынама түрін Оңтүстік Кореяға жібереді. Қысқасы, сапаға қатты көңіл бөлінеді.
Зауыттағы «Hyundai», «Kia» маркалы су жаңа көліктерге «Protec» брендінің антифризін құяды. Мұнымен қоса, Сарандағы «QazTehna» зауытынан шығатын YUTONG автобустарына осы сұйықтық қолданылады. Қостанайдағы көлік құрастыратын «СарыарқаАвтоПром» ЖШС-мен де серіктес.
«Біз көбіне тендерге қатысамыз. «Қазақстан темір жолы», «Қазпошта» секілді іргелі ұйымдармен жұмыс істейміз. Қазір қытайлық «CNPC» компаниясымен келіссөз жүргізіп жатырмыз. Келесі жылы өнімді оларға да жеткізіп қалуымыз мүмкін. Өйткені өнімдеріміздің сапасын жоғары бағалап отыр. Жалпы, антифризіміз шетелдік көліктерде тұрақты қолданылып келеді. Біз ISO 9001:2015 сапа менеджменті жүйесін енгіздік», дейді кәсіпорын директоры Светлана Сороколетова.
Қарағандыдан шығатын антифриздер былтырдан бастап Өзбекстан мен Ресейге экспортталады. Ендігі жоспар – Қытай нарығы.
Кәсіпорында сапаны бақылайтын зертхана мен ғылыми-зерттеу орталығы бар. Онда шикізат та, дайын өнім де зерттеледі. Антифриз суының сынамасы айына бір рет зертханадан өтеді. «Біздің химик-технолог, былтыр докторантураны бітірді. Оңтүстік Кореяға барып, тәжірибе алмасып келді», дейді кәсіпорын басшысы.
Кәсіпорыннан жеңіл көліктерге, жүк және ауыл шаруашылығы техникаларына арналған 12 түрлі өнім шығады. Антифриз 200 литрлік бөшке мен түрлі көлемдегі құтыларға құйылып сатылады. Өнімнің сыртында QR код бар. Сол арқылы кәсіпорынның сайтына өтіп, көлігіңіздің маркасын таңдасаңыз, қандай антифриз құю қажеттігі жөнінде кеңес аласыз.
Зауыт жабдығының көп бөлігі – отандық өнімдер. Еуропа мен Ресейден тек арнайы сорғылар алынған. Бағдарламалық жүйе де солардікі. Бүгінде кәсіпорынның айына 160 тонна өнім шығаратын қуаты бар. Нарықты жаулай бастаған Қарағандының антифризіне сұраныс күн өткен сайын артып келеді. Сол себепті, кәсіпорынды модернизациялау қолға алына бастады. Енді төрт тонналық контейнерлер келеді. Зауытты жаңа құрылғы, жабдықтармен жаңарту жұмыстары жолға қойылып жатыр.
– Түнгі ауысыммен жұмыс істеуге болады. Бірақ ол қиын, қателесіп кетуі мүмкін. Сондықтан дұрысы – жұмыскер санын артыру. Онда бір ауысымда 12 тоннаға дейін өнім өндіреміз. Кәсіпорын біртіндеп автоматтандырылып келе жатыр. Жұмыстың көп бөлігін компьютер арқылы атқарамыз. Қандай қоспа қосу керек, қанша мөлшерде, оның бәрі бағдарламалық жүйемен жүзеге асады, – дейді директор.
Аталған кәсіпорын алғашқыда «Роснефть» кәсіпорнының өнімдерін сатқан. Кейін өздері шығаруды ойластырады. Ол кезде Hyundai және Kia көліктеріне құятын елімізде антифриз жоқ еді. Сол себепті, зауыт басшылығы Корей өндірушілеріне шығып, келісім алған. Кәсіпорын «Damu» кәсіпкерлікті дамыту қорының көмегімен зауыт құрылғыларын жаңартып қойыпты.
Қазір онда 40-қа жуық адам жұмыс істейді. Өскемен мен Алматы қаласында филиалдары бар. Астанадан да ашуды жоспарлап жүр. Ендігі ойлары – шетелден қоспа тасығанша, оның да өндірісіне кірісу. Бұл шаруаға да білек сыбана кірісіп кетті. Жақын арада өздері әзірлеген қоспа арқылы екі өнімді шығарып көрмек. Алғашқысы сынақтан сәтті өтіпті.
Кәсіпорынның антифриз сұйықтығын нарыққа шығарғанына биыл бес жыл толды. Ішкі қажеттілікті де қамтып, сыртқы тұтынушылардың да сұранысына ие болып жатыр. Көлік иелері сапасына да, бағасына да риза. Кәсіпорынның о бастан көздегені де осы еді.
Қарағанды облысы
