Әуе қорғанысы күштерінің офицерлері балаларға өз қызметінің ерекшеліктері мен Отанымыздың әуе шекараларын қорғаудағы маңызы жөнінде қызықты әңгімелеп берді. Өз кезегінде балаларды әскери қызметшілердің күнделікті өмірі мен әскердегі басқа да көптеген қызық ерекше сезімге бөледі. Әсіресе бүлдіршіндер әскери техника жайындағы әңгімелерді керемет әсерге беріле отырып тыңдады. Олардың көздерінен әскери салаға деген құштарлық пен қызығушылықтың ұшқыны оянғанын аңғару қиын емес еді. Сонымен бірге тәрбиеленушілер әскери форманы да аса бір зор сезіммен тамашалап, тіпті қолдарымен ұстап көрді. Бұл орайда келген қонақтар балаларға әскери шеврондар мен айрықша белгілерді қалай ажырату мен тануды үйретті.
Бүлдіршіндермен танысқаннан кейін әскери қызметшілер оларды келе жатқан Наурыз мерекесімен де құттықтады. Әскерилер өздерімен бірге ала келген тәттілер мен дамытушы ойыншықтарды сыйға тартты.
10216 әскери бөлімі командирінің орынбасары майор Дінмұхамед Нұрақаевтың айтуынша, Наурызнама күнтізбесі бойынша алдағы он күн түрлі тақырыппен мереке ретінде атап өтілмек. Наурыз мейрамының басты ерекшелігі – жыл басының символы әрі ұлттық дәстүрлер мен әдет-ғұрыптарды жаңғыртуға ерекше мүмкіндік беретін мәні бар мереке.
«Бүгінгі кездесуде біз балаларға келешекте ұқыпты азамат болып өсуге талпындыратын әсерлі сөздер айттық. Оларды еліміздің нағыз патриоты болып қалыптасуға, халқымыздың әдет-ғұрпын құрметтейтін мәдениетті жан болып жетілуге үндедік. Осылайша, балалар кішкентайынан дұрыс тәрбие алып өссе, келешекте ондай ұрпақтан жанашыр азамат, қиын сәтте өзара көмек пен қолдау білдіретін нағыз елдің ұландары жетіліп шығады. Біз үшін ең бастысы балалардың жанарындағы қуанышын көру болды. Одан артық бізге алғыс та, сый-сияпат та жоқ», деді майор Д.Нұрақаев.
Кездесу соңында тәрбиешілер бүлдіршіндермен бірге әскерилерге Отанымыздың шекарасын қорғау жолындағы еңбектері үшін алғыстарын жаудырып, балалардың шығармашылық тобы дайындаған арнайы мерекелік концертін қойды.
ШЫМКЕНТ
