Төтенше жағдай • 27 Наурыз, 2024

Дала өзендері тасыды

72 рет
көрсетілді
3 мин
оқу үшін

Күннің күрт жылынуынан Ақтөбе облысындағы далалық өзендер – Ембі, Жем, Сағыз, Темір, Ырғыз, Қауылжыр өзендеріндегі су деңгейі көтері­ліп, бір­неше елді мекенге су басу қаупі төнді.

Дала өзендері тасыды

26 наурызда Ойыл ауданы­ның Амангелді, Шұбарши, Сарал­­жын ауылдарының шетіне кірген қар­ғын судың беті қайтарылды. Осы күні Ырғыз өзені Шеңбертал елді мекенінің өткеліне келіп тіреліп, жолды су басты, ауыл қатынассыз қалды. Байғанин ауданының Оймауыт, Миялы, Дияр елді мекендеріне баратын автокөлік жолын бірнеше жерден су шайып, аудан орталы­ғы – Қарауылкелдідегі С.Бәйішев, Барақ батыр көшелері бо­йын­дағы тұрғын үйлерге су кірді. Қарауылкелдіге кірген қарғын судың бетін қайтаруға ТЖД, поли­ция департаменті, жергілікті атқарушы орган қызметкерлері жұмылдырылып, олар су басу қаупі бар үйлердің жанына құм тасып, жайылған судың шетін инерт­ті материалдармен толтырды. Мұғалжар ауданы «Қожа­сай – Жаңажол» бағытындағы жергілікті маңызы бар жолдың 4 шақырымын су шайып кетіп, Қожасай мен Жаңажол ауылдары қатынассыз қалды. Қазір бұл жерден жеңіл көліктер өте алмай, қаңтарылып тұр. Темір ауданы орталығы Шұбарқұдық кентінің бес тұрғын үйіне және 25 үйдің ауласына су кірді. Бұл жақтағы жағдайды реттеуге ТЖД, поли­ция департаменті, Төтенше жағ­дайлар министрлігінің Ақтөбе қаласындағы №20282 әске­ри бөлімінің курсанттары жұ­мылдырылды. 26 наурыз күні «Пок­ровка – Темір – Кеңқияқ – Ембі» (115-175) және «Жаңа­жол – Қотыртас» облыстық маңы­зы бар автожолдар учаскесінде жүк көліктерінің қозғалысына шектеу қойылды. Өйткені Жем және Қауылжыр өзендерінің екпінді суы жол бойындағы көпірлерді бұзып кетуі әбден ықтимал деген қауіп зор.

Облыстық ТЖД бас маманы Әлішер Сарбаевтың ха­бар­­лауынша, 26 наурызда рес­пуб­­ликалық маңызы бар «Қанды­ағаш – Ембі – Шалқар – Ырғыз» тасжолының 288 шақырымын, облыстық маңызы бар «Қара­уылкелді – Алтай батыр – Мия­лы» автокөлік жолының 63 ша­қы­рымын және Әйтеке би ауда­ны Қайрақты ауылдық округі Тал­­дық ауылының кіреберіс жо­лын су шайып кетті. Ақтөбе об­лы­сындағы су тасқынына көмек­ке Маң­ғыстау облысынан 52 адам­нан тұратын құтқару жасағы бес тех­ни­касымен келді. Темір өзе­ні Жаңа­жол газ өңдеуші зауытына жа­қын орналасқан. Саркөл, Шұ­бар­ши елді мекендеріне де қарғын су кіріп келуі мүмкін. Сейсенбі күні Ақтөбеге ТЖМ вице-мнистрі Ерлан Нұрпейісов келіп, бірден Темір ауданына жол тартты.

Еріген қар суымен толық­қан далалық өзендер арнасы­ның күрт көтерілуі ауыл жұр­тын әбігерге салды. Айта кету керек, Мұғалжар қыраттарынан бас­тау алатын бұлақтармен жалғас­қан Елек, Ойыл, Жем, Сағыз, Темір, Ор, Ырғыз, Ембі өзендерін­дегі судың тасуы әдетте сәуір­дің алғашқы онкүндігінде өтетін. Бұл жолы кеуіп кеткен өзен ар­наларының күрт көтерілуіне далалықта жерге сіңбей еріген қардың суы себеп болған. Ал қазір су басып жатқан ауыл үйлері ертеректе көктемде су жа­йылатын жерлерге салынған. Жа­қын күндері далалық өзен­дер деңгейі әлі де көтерілуі мүмкін.

 

Ақтөбе облысы