Massaget.kz тілшісі жазғандай, Қарауылкелді ауылының тұрғындары үйден шыға алмай отырғандарын айтады. Себебі ауыл ішінде еріген қар суы үйдің ішіне дейін кірген. Тұрғындар көшеде су кешіп жүр.
«Жылда осы жағдай қайталанады. Былтыр да үйімізді су басқан. Биыл да міне, әбігерге түсіп отырмыз. Мен сыртқа шыға алмай отырмын. Су етіктен асып кетіп тұр. Үйдің ішіне кіріп жатыр. Қора, сарайдың бәріне су кірді. Сарайдың бір шеті құлады. Көршілеріміздің де жағдайы осындай», дейді Барақ батыр көшесінің тұрғыны Гүлмира.
Тұрғындар былтыр да үйлерінің суға кеткенін еске алды.
Ал Байғанин аудандық әкімдігінің әлеуметтік желідегі ресми парақшасында аудан әкімі Айбек Көпенов жағдай бақылауда екенін айтты.
«Республикалық «Ақтөбе-Астрахан» тас жолының су өткізгіш құбырлары арқылы аудан орталығына дала суы кіріп, бірнеше көшеге жайылды. Шамамен төрт-бес көшені су басып, үйлердің аулаларына су келді. Аудан әкімдігі жанындағы штаб шұғыл әрекет етіп, қауіптің негізгі дені сейілді. Судың деңгейі қайтты», деді аудан әкімі.
Сондай-ақ аудан әкімі жұмыс тобы құрылғанын, аулалары суға кеткен үйлердің жағдайы зерттелетінін айтты.
