Қазақстан мұсылмандары діни басқармасы Шымкент қаласы өкілдігінде мұндай ізгі амал – жыл сайын әрбір Ораза айында болып тұратын қайырымды іс-шара. Мегаполистің бас имамы Бағдәулет Әбдірахмановтың айтуынша, діни басқарма жағдайы төмен азаматтарға, көпбалалы отбасыларға, мүгедектігі бар жандарға қолдан келгенше көмектесіп келеді.
«Көмекке мұқтаж кісілерден сұранарымыз, азық-түлік қоржынын құр алып қоймай, пітір садақасын берген қайырымды жандарға да дұға-тілектерін арнап қойса екен. Исламда әрдайым алаған қолдан береген қол жоғары тұрады. Бұл жөнінде ардақты Пайғамбарымыз Мұхаммед ғалейһи салам да өз хадисінде айтып өткен. Осы орайда біз де осы жерге алақан жайып келген адамдардың ұрпағынан келешекте садақа алушы емес, беруші жандардың шығуын нәсіп етуін Алладан шын жүректен сұраймыз», деді Б.Әбдірахманов.
Бізге берген сұхбатында имам зекет малын шығаруға шамасы келетін әрбір адам пітір садақасын беруге міндетті екенін жеткізді. Ал шамасы келмейтін жандардың пітір садақасы шариғат тұрғысынан сүннет амал боп саналады. Яғни пітір үлестіріп қайырымдылық жасаса, сауап алады, болмаса оған ешқандай күнә жазылмайды. Рамазан айында ең бірінші қажет болған жақсы амал – осы пітір садақасы. Мүмкін болғанша әр адам өзінің жағдайы төмен туысқанына, көрші-қолаң, жақын араласатын жандарына көмек қолын созып, сыйлық ұсынғаны абзал.
Имамның айтуынша, бүгінгі таңда пітір садақасының құны екі кило бидайдың бағасына тең. Дегенмен асыл шариғатымызда оны азық-түлік түрінде де таратуға болады. Ол азыққа арпа, бидай, құрма, мейіз кіреді. Отбасыдағы әрбір адамның атынан осы дақылдардың шамамен 3 килодай мөлшерінде жан садақасы, яғни пітір садақасы берілуі тиіс. Сондықтан садақаны ақшалай ғана емес, азық-түлік есебінде де берсе, сауабы еш өзгермейді.
Сонымен бірге зекет малы да қасиетті Ораза айында таратылса, сауабы молырақ болады. Ал жалпы мұсылманшылықтағы бес парыздың біріне кіретін бұл садақа жыл он екі ай үлестіріледі. Балиғат жасына жеткен, ақыл-есі бүтін, дүние-мүлкі нисап мөлшеріне сай, яғни 85 грамм алтынға тең қаражаты, ақшалай есептегенде шамамен 1,4 млн теңгесі болса, міне осындай азаматтарға зекет малын шығару парыз болады. Айтқандай, бұл мөлшердегі қаражат мұсылман жанның иелігінде, айналымында бір жыл бойы жүруі керек. Өйткені имам мәлімдегендей, бүгінгі таңда көпшілік азаматтың депозитінде үй алуға салымдары бар. Егер олардың басында ешқандай баспана болмаса, зекет беру парыз болмайды, керісінше қосымша үй алуға әрекет жасаған болса, зекет малын ондай кісілерге міндет боп жүктеледі. Сондай-ақ Исламда төрт түлік малдың да зекеті бар. Қырық қойдан бір қой, 27 сиырдан бір тана зекет малына кіреді.
ШЫМКЕНТ
