Фото: gov.kz
Ғылым және жоғары білім министрлігінің хабарлауынша, құжаттарды қабылдаудың соңғы күні: 2024 жылдың 12 мамыры (24.00-ге дейін). «Абай-Верн» стипендиялық бағдарламасы – Қазақстан Республикасы Ғылым және жоғары білім министрлігі мен Француз Республикасының Еуропа және сыртқы істер министрлігі арасындағы бірлескен жобасы. Бұл бағдарлама шеңберінде мамандық таңдауға шектеусіз қазақстандық жоғары оқу орындарында оқитын екінші оқу жылындағы магистранттар үшін 45 стипендия және диссертациялық жұмысын бірлескен ғылыми жетекшілік негізінде жүзеге асыруды көздеген докторанттар үшін 5 стипендия ұсынылады.
Министрлік жариялаған хабарландыруда: «Магистратураға шәкіртақы алуға конкурсқа жас шамасына шектеу жоқ, Қазақстан Республикасының азаматы, 2024-2025 оқу жылына қазақстандық жоғары оқу орны магистратурасының 2-курсында оқитын, Францияның университетіне Master 1 немесе Master 2 бағдарламасы бойынша қабылданғаны жөнінде шақыру немесе растау хаты бар үміткерлер қатыса алады. Соның ішінде қос диплом бағдарламалары бойынша білім алушыларға басымдық беріледі. Ал докторантураға шәкіртақы алуға конкурсқа қатысу үшін: Қазақстан Республикасының азаматтығының болуы; жас шамасы шектеусіз; 2024-2025 оқу жылына диссертацияны бірлескен ғылыми жетекшілікпен даярлауды көздейтін қазақстандық университеті докторантурасының 1-курсына тіркелу; Францияның жоғары оқу орнына докторантураның 1-курсына қабылданғаны жөнінде шақыру немесе растау хаттың болуы талап етіледі», делінген.
Бағдарлама бойынша стипендия ұтып алған магистранттарға айына 10 ай ішінде (қыркүйектен маусымға дейін) 800 еуро, докторанттарға 3 жыл ішінде жылына 6 ай мерзімге айына 1500 еуро көлемінде шәкіртақы (жоғары оқу орны бұйрық шығарған кездегі Қазақстан Республикасы Ұлттық банкінің курсына сай) төленеді. Ал Француз үкіметінің әлеуметтік қамту бойынша шәкіртақысы (BCS) мынадай мүмкіндіктер береді:
– Францияға тегін ұзақмерзімді студенттік виза (негізінде стипендия алмайтын студенттерге виза 99 еуро тұрады);
– Франциядағы мемлекеттік оқу орындарының көпшілігінде міндетті тіркеу жарнасын (шетелдік студенттер магистратурада оқу үшін тіркеу жарнасына жылына 3 770 еуро, докторантурада оқу үшін жылына 380 еуро төлеуге тиіс) төлеуден босатылады;
– CROUS жатақханаларынан орын ала алады (CROUS мемлекеттік университет жатақханасының жалдау ақысы айына 300-ден 600 еуроға дейін, ал жекеменшік секторында айына 800-ден 1000 еуроға дейінгі соманы құрайды);
– Студенттік асханаларда жеңілдікпен (кешенді түскі ас-1 еуро) тамақтанады;
– Тегін қосымша медициналық сақтандыру (шәкіртақы алмайтындар үшін 300 еуро) ақысы төленеді;
– Campus France агенттігі тарапынан ақпараттық қолдау көрсетіледі.
Бірақ стипендиат мына мәселені түсінуі керек, көлік шығындарын студенттер өз қалтасынан төлейді. Осыған қоса студент барлық сабаққа қатысуға міндетті, олай болмаған жағдайда шәкіртақыны төлеу тоқтатылады. Оқу жылы барысында студенттің бастамасымен оқу тоқтатылған жағдайда (төтенше жағдайларды қоспағанда), студент бұрын аударылған қаражатты толық көлемде қайтаруға тиіс.
Үміткердің құжаттамасына қатысты талаптарға келсек, Француз жоғары оқу орындарына немесе ғылыми-зерттеу орталығына магистратура немесе докторантура бағдарламалары бойынша оқуға алдын ала қабылданғаны жөнінде шақыру-хаты болу керек. Қабылдау рәсімі аяқталмаған жағдайда, өтініштің көшірмесін тіркеу қажет. Одан кейін таңдалған бағдарламаға байланысты француз немесе ағылшын тілінде, сондай-ақ қазақ немесе орыс тілінде түйіндеме және тура осындай тілдерге қатысты тәртіппен уәждемелік хат (бір парақ, тек алдыңғы жағы) талап етіледі. Паспорттың бірінші бетінің, бакалавриаттан бастап дипломдар мен бағалары бар қосымшалардың куәландырылған көшірмесі керек. Француз тілінде оқу бағдарламасын таңдаған үміткерлер B1 (DELF, DALF, TCF) деңгейінен төмен емес француз тілін меңгергені туралы диплом өткізуге тиіс. Бірақ бұл талап жоғары оқу орындарда француз тілінде білім алған үміткерлерге қолданылмайды. Сол секілді ағылшын тілінде оқу бағдарламасын таңдаған үміткерлер В2 (ТОЕІС, ТОЕFL, ІЕLТS) деңгейінен төмен емес ағылшын тілін меңгергені туралы диплом тапсыруға міндетті. Бірақ мұнда да жоғары оқу орындарда ағылшын тілінде білім алған үміткерлерден талап етілмейді. Докторантураға оқуға үміткерлер қосымша мынадай құжаттарды тапсырады: 1.ғылыми жетекшінің пікірімен қоса ғылыми зерттеу жобасының қысқаша сипаттамасы (диссертацияның тіліне байланысты француз немесе ағылшын тілінде – екі бет), сондай-ақ қазақ немесе орыс тілінде; 2.шығарылған ғылыми еңбектері мен жарияланымдарының тізбесі (ағылшын немесе француз тілінде), сондай-ақ қазақ немесе орыс тілінде; 3.Ғылыми жетекшілері тарапынан ағылшын немесе француз тілінде ұсыныс хат (еркін нысанда), сондай-ақ қазақ немесе орыс тілінде.
Үміткер өзінің құжаттамасын 10 Мб аспайтын PDF форматында verne@gmail.com электрондық мекенжайға жіберу қажет. Барлық құжаттама магистратура бағдарламалары үшін «2024Master_ТЕГІ_ЕСІМІ» деген атаумен, докторантура бағдарламалары үшін «2024PhD_ТЕГІ_ЕСІМІ» деген атаумен және тегі мен есімі төлқұжаттағыдай латын әріптерімен жазылып жолдануы керек. Дұрыс ресімделмеген құжаттамалар қарастырылмайды. Құжаттама қабылданғаннан кейін үміткерге растау-хат жіберіледі. Іріктеуді тәуелсіз Қазақстан-француз аралас комиссиясы жүзеге асырады. Конкурстың нәтижелері 2024 жылғы маусым айының басында Францияның Қазақстандағы Елшілігінің https://kz.ambafrance.org/сайтында жарияланады. «Абай-Верн» бағдарламасына қатысты қосымша ақпаратты Француз Альянстары жанында орналасқан Campus France агенттіктері тарапынан алуға болады.
