Аталған білім ордасында студенттерге Ғали Орманов кітапханасынан жаңа құрылғылармен жабдықталған үлкен бөлме қолданысқа берілді. Салтанатты жиынға оқытушылар мен білімгер және «Huawei» компаниясының өкілдері қатысты. Әуелі ЖУ-дің ректоры Ермек Бөрібаев пен «Huawei Technologies Kazakhstan» компаниясы бас директорының орынбасары Xu Hai білім ошағы мен компания арасында ынтымақтастық орнату жөніндегі меморандумға қол қойып, алдағы атқарылар жобаларға баға берді.
Меморандум аясында екі тарап бірлесіп, IT және телекоммуникация саласында жоғары білікті мамандарды даярлайды. Сондай-ақ бірлескен білім бағдарламаларын әзірлеп, ғылыми зерттеулер жүргізуге уағдаласты. Оған қоса инновациялық өнімдер жасау көзделген.
«Студенттер үшін қазір мүмкіндік көп. Олар кішкентай ғана терезеден білімнің қайнар көзін тауып, соны тиімді пайдалана алулары тиіс. Олардың білім алуына біз барлық жағдайды жасаймыз. Түрлі технологияны пайдаланып, өз білімдерін шыңдау керек. Білімде шекара жоқ. Жастар осы мүмкіндікті орнымен пайдаланса, жетістікке жететіні анық», дейді Xu Hai.
«Huawei» орталығы заманауи телекоммуникациялық құрылғыларымен және бағдарламалық өнімдерімен толық қамтылған. Академияда Жетісу университетінің студенттері, IT саласының мамандары ақпараттық технологиялар мен телекоммуникация бойынша білім алып, біліктілігін арттырады.
«Бүгін бір үлкен жаңалықтың куәгері болып отырсыздар. «Huawei» компаниясының қолдауымен үлкен академия ашылып жатыр. Бұл оқу ордасы білімгерлерінің сандық білімдерін дамытуға бағытталған. Осы академия облыстың өркендеуіне жақсы жаңалықтар алып келеді деп ойлаймыз. Мұнда сабақ беретін мұғалімдер академияның базасында толық оқудан өтті, енді алған білімдерін студенттерге үйретуге дайын. Біз «Huawei» компаниясымен әлі де бірлесіп жұмыс істеп, орталықты дамытуға күш саламыз», деді университет ректоры Е.Бөрібаев.
Енді университет оқытушылары мен студенттері «Huawei» компаниясының бөлімдерінде тағылымдамадан, өндірістік және ғылыми зерттеу тәжірибелерінен өте алады.
Жетісу облысы
