«Қазақстан теміржолдарының тарихы» атты электрлі картада төңкеріске дейінгі кезеңнен бастап қазіргі уақытқа дейінгі теміржолдың қалай салынғаны көрініс тапқан. Залдың қақ ортасында «Достық», «Алашанькоу» халықаралық желісіне, Тұрар Рысқұлов пен Мұхаметжан Тынышбаевқа арналған төрт турникет орналасқан. Бұдан бөлек, экспозициядан ел аумағындағы теміржол бекеттерінің ашылу барысынан хабар беретін шой-шеге, кілт, балға, рельстік қосылыс сияқты бұйымдардың сандаған түрін кездестіруге болады.
«Жібек жолы» залының қабырғасында еліміздің қалыптасуының өлкетану көрінісі, теміржол көлігінің пайда болуы, ежелгі Жібек жолы тарихы кезең-кезеңімен көрініс тапқан. Күмістен күптелген зергерлік бұйымдар, тұрмыстық құрал-жабдықтардың жабындықтары, сирек кездесетін фотосуреттер сала тарихын тереңнен тануға шақырады.
– Музей алғаш есік ашқан күннен бастап 50 мыңнан астам азамат мұнда бас сұғып, маңызды жәдігерлермен танысты. Музейге тек қала тұрғындары, студенттер мен оқушылар ғана емес, шетелдік туристер де көп келеді. Себебі теміржол тарихы өткен күндердің талай кезеңдерімен өзара сабақтасып жатыр. Еліміздің теміржол көлігінің рөлін насихаттаудың бірегей орталығы саналатын біздің музей тарихқа қызығушылық танытатын келушілерін қуана қарсы алады, – дейді музей мамандары.
Елімізде шойынжол барлық жүк тасымалы айналымының 70 пайызын, ал жолаушы тасымалының 34 пайызын қамтып отыр. Көршілес мемлекеттермен барлығы 16 теміржол торабы байланыстыратын Қазақстан теміржолының жалпы ұзындығы 15 мың шақырымнан асады.
АЛМАТЫ
