Фото: Ұлттық ұлан
Қазір Батыс Қазақстан және Атырау облыстарында су басу қаупі өте жоғары. Апаттың алдын алу үшін ұландықтар су басқан аудандардың тұрғындарын эвакуациялаумен белсенді шұғылданып, тұрғын алаптарда құм салынған қаптардан бөгет тұрғызып жатыр. Мәселен, Батыс Қазақстан облысының елді мекендерінен тұрғындарды эвакуациялау барысында Ұлттық ұланның 5517 әскери бөлімінің әскери қызметшісі Мәулен Марленов су ортасында қалған адамдарды дер кезінде құтқарды. Ол су тасқынының ортасында тұрып қалған жүк көлігінен 30 адамды шығарып, қауіпсіз аймаққа эвакуациялады.
Орал қаласындағы Ұлттық ұланның жергілікті полкіне 300 адамнан тұратын Шымкент жедел бригадасының жеке құрамы және Қызылордадан 200 сарбаз көмекке келді. Атырау облысында да су тасқыны жағдайы күрделі болып тұр. Атырау қаласындағы 5546 әскери бөлімінің 120-дан астам сарбазы полиция қызметкерлерімен бірлесіп, Құлсары қаласының көшелерінде иесіз үйлердегі дүние-мүлікті тонауға жол бермеу бойынша қызмет атқарып жүр. Сондай-ақ жеке құрамның бір бөлігі гуманитарлық жүктерді түсіруге, жағалауды нығайту жұмыстарына тартылды. Оларға Қарағанды қаласында орналасқан 5451 әскери бөлімінен 500 жауынгер көмекке келді. Ақтөбе мен Қостанайда су тасқынына қарсы іс-шаралар мен қоғамдық тәртіпті қорғау үшін жеке құрамды тарту жалғасып жатыр. Жергілікті 6655 және 6697 әскери бөлімдері осы мақсаттар үшін 400-ден аса әскери қызметші бөлді.
Еліміздің солтүстік өңірінде де қауіп сейілген жоқ. Петропавлға әскери академияның 400 курсантына және жергілікті Ұлттық ұлан полкінің 200 сарбазына астаналық сарбаздар көмекке келді. Су тасқыны басталғаннан бері Ұлттық ұланның 3 мыңнан аса жауынгері, 145 автомобиль техникасы және 7 әуе транспорты іске араласты. 1 644 адам эвакуацияланып, инертті материалдары бар 462 мың қапшық дайындалып, тиісті жерлерге төселді және 110 тонна гуманитарлық көмек жеткізілді.
