Солтүстікқазақстандық кәсіпкер мешіт салып берді

ПЕТРОПАВЛ. 5 қаңтар. Есіл ауданындағы Жарқайың ауылында жаңа мешіт халық игілігіне тапсырылды. Бұл туралы «Қызылжар» орталық мешітінің баспасөз қызметі хабарлады. Алла тағаланың жердегі үйін осы ауылдың тумасы, бүгінде Алматыда тұратын жеке кәсіпкер Дулат Қалитов өз қаражатына тұрғызды. Ғибадатхананың салтанатты ашылуына «Қызылжар» орталық мешітінің бас имамы Кенжетай қажы Байкемелұлы, аудан әкімі Мұратбек Әбішев Алматыдан, Астанадан қонақтар, ауыл тұрғындары қатысты. Жарқайың ауылында алғашқы мешіт 1853 жылы салыныпты. Оны ашуға Данияр би Оразұлы деген ақсақал мұрындық болыпты. 1930 жылы құлшылық орны бұзылып, мектепке айналдырылыпты. – Мешіт салудағы ниетім дәулетімді көрсету емес, керісінше, ауыл жұрты мешітсіз қалмасын деген ойдан туған еді. Биыл кәсіпорын ашуды жоспарлап отырмын», – дейді жеке кәсіпкер Дулат Қалитов. Ғибадатхана құрылысын толығымен өз мойнына алған ол қажылық парызын өтеп келіпті. Мекке-Мәдинаға жасаған сапарынан ала келген Құран Кәрім мен жайнамазды мешітке тарту етті. Әруақтарға дұға бағышталып, ас берілді. Бір жарым жылдың ішінде салынып, пайдалануға берілген ғибадатханада кітапхана, асхана жұмыс істейді. Қазіргі күні өңірдегі мешіттер саны 67-ге жетті. Өмір Есқали. Дерек: «Қызылжар» орталық мешітінің баспасөз қызметі. Сурет: muftyat.kz.