Суретті түсірген – Ақәділ Рысмахан
«Таза аула. Таза өлке. Таза ел!» ұранымен өтіп жатқан экологиялық акцияға өңір басшысы Ербол Қарашөкеев бастап, өзге де атқамінер азаматтар қатысты. Бұл күні көне шаһардағы жаңа шағын аудан саналатын «Ұлы даланың» аумағына 125 түп қараағаш, 100 түп емен, 170 түп терек пен 101 түп шырша көшеті егілді.
Жалпы алғанда өңір бойынша «Таза Қазақстан» акциясына 27 мыңнан аса облыс тұрғыны үлес қосып жатыр. Қалалар мен ауылдарды абаттандыруға атсалысып жатқандардың ішінде түрлі кәсіпорын мен әлеуметтік мекемелердің 5 222 қызметкері бар екенін айта кеткен жөн. Іс-шара басталғалы бері өңірде 60 тарихи-мәдени ескерткіштің маңайы қоқыстан тазартылып, 143 саябақ, 1 400-ге жетеғабыл аула, 8 300 шаршы метр су жүйелері тазаланды.
Жергілікті атқарушы билік келтірген дерекке жүгінсек, өңір бойынша абаттандыру, көгалдандыру және санитарлық тазалау жұмыстарына қазынадан 9,4 млрд теңге қаржы қарастырылған. Қазіргі кезге дейін 57 100 көшет егілген екен. 809,4 мың шақырым арық-атыз тазаланған. Бұл жұмыстар алдағы уақытта да сәтімен жалғасады.
«Президент тапсырмасы аясында қала инфрақұрылымын жақсарту үшін кешенді жұмыстар жүргізіліп жатыр. Мемлекет басшысы қалаларды лайықты және тартымды етіп ұстаудың маңызы зор екенін атап өткен еді. Осы орайда өңір халқы жұмылған жұдырықтай бірігіп, экологиялық акцияға белсенділікпен қатысып жатқанын айта кеткен жөн», дейді өңір басшысы Е.Қарашөкеев.
Ресми дерекке сенсек, қазіргі кезде Тараз қаласындағы ағаштарды түгендеу жұмыстары жүргізіліп жатыр. Осы жұмыстар аяқталғаннан кейін қала бойынша ұтымды суару жүйесін қалыптастыру мақсатында арнайы дендрокарта жасалмақ.
Тараз
