Суретті түсірген – Жеңіс Ысқабай
Бұл ойын алаңын шағын елді мекен балалары көптен күткен еді. Тұрғындар да сан рет қала әкімдігіне хат жазып, мәселені ортаға салған. Қазір Еркін ауылдық округіне қарайтын 3-бөлімшеде 150 түтін тұрады. Мұндағы тұрғындар бүлдіршіндер үшін заманауи талапқа сай жабдықталған ойын алаңы қажет екенін айтып, тіпті облыс әкімдігіне де хат жазыпты. Осы ретте игілікті бастамаға «Халық қатысатын бюджет» бағдарламасы мұрындық болған. Өңір әкімінің баспасөз қызметінің мәліметінше, аталған жобаға 14 млн теңге қаржы бөлінген. Ал құрылыс жұмыстарын «Mir&Er» ЖШС қолға алған.
Осы сәтті балаларымыз көптен күтті. Қаланың сыртында орналасқандықтан, балаларымыз ойнайтын жер таппай, қалаға баруға тура келетін. Жаңа алаңда балалардың қауіпсіздігі үшін барлық жағдай жасалған. Өзіне лайықты шағын қоршауы бар. Ең бастысы, жерге резеңке жабындысы төселген, ойын құралдары да сапалы. Енді балаларымыз осы алаңда алаңсыз ойнайды», дейді бөлімше тұрғыны Светлана Ажикенова.
Талдықорған қаласы әкімдігінің мәліметінше, уақыт өткен сайын аталған бағдарламаға қатысқысы келетін тұрғындардың саны артып, олар ең маңызды деген жобаларды белсенді ұсына бастаған. Бұл өз кезегінде абаттандыру жұмыстарының қарқынды жүруіне септігін тигізіп жатыр.
«Халық қатысатын бюджет» жобасы бойынша өткен жылы 12 жоба белгіленсе, соның бесеуі іске қосылып, Ынтымақ, Еркін ауылдары, Жастар-1, Көктал тұрғын ауданында ортақ қолданыстағы аулалар абаттандырылды, ал қалған 7 жобаны биыл аяқтаймыз. Атап айтқанда, «Алмалы», «Ащыбұлақ», «Үйтас» саяжайларында, 3-бөлімше және Батыс тұрғын ауданында спорт және балалар алаңдарын орнатып, Көкталда тротуар ағымдағы жөндеуден өтпек. Соның бірі 3-бөлімшедегі балалар ойын алаңы қолданысқа берілді», дейді қала әкімінің орынбасары Рүстем Бершінбеков.
Оның айтуынша, биыл «Халық қатысатын бюджет» бағдарламасына 500 млн теңге қарастырылып отыр. Бүгінде 68 жоба түскен, соның 22-сі – дауыс беру сатысында. Көп ұзамай 22 жобаның шешімі шыққаннан соң қалалық ТҮКШ бөлімі конкурсқа беру жұмыстарын бастайды.
Айта кетейік, «Халық қатысатын бюджет» – азаматтардың жергілікті бюджет қаражатын бөлуге қатысуы. Тұрғындардың өздері абаттандыру идеяларын ұсынады, оларды жоба деңгейіне дейін пысықтайды, содан кейін онлайн дауыс беру арқылы жеңімпаздарды таңдайды.
Жоба тұрғындарды кез келген жергілікті проблеманың айналасында біріктіреді, көршілерді талқылауға тартады, ауланы, саябақты немесе алаңды қалай жақсы жабдықтау керектігін түсінуге мүмкіндік береді.
Жетісу облысы
