«Жасыл» экономикаға жол ашық

Кеше Орталық коммуникациялар қызметінде «Жасыл» экономика үшін және G-Global-ды дамыту коалициясы» ЗТБ атқарушы директоры Асхат Сүлейменов брифинг өткізді. Онда коалицияның атқарып жатқан жұмыстары сөз болды. Спикердің сөзіне қарағанда, биылғы жылы Астанаға іргелес Аршалы ауданына қарасты Арнасай ауылында «Арнасай – жасыл алқап» жобасы жүзеге асырылады екен. Аталған алқапта еліміздегі ең үздік әрі тиімді, оған қоса қолже­тімді жасыл технологиялар шоғырландырылып, жинақталатын көрінеді. «Бүгінде жасыл техноло­гия­лар шағын және орта бизнестің бәсекеге қабілеттілігін арт­тыру­ға мүм­кіндік береді. Сон­дай-ақ, елімізде Біріккен Ұлттар Ұйымының Даму бағдарламасы бірнеше жылдан бері жұмыс істеп келеді. Осы күнге дейін олар Маң­ғыстау, Қызылорда, Шығыс Қазақ­стан, Ақмола облыстарында әлеу­меттік нысандарда бірталай жасыл жобаларды жүзеге асырды», деді А.Сүлейменов. Коалиция директорының сөзіне қарағанда, енді осынау озық жоба­ларды біртіндеп бизнеске енді­ру жұмыстары жүргізіліп жатыр. «Осы сұрақтар төңірегінде жақында Біріккен Ұлттар Ұйымының Даму бағдарламасының басшыларымен кездестік. Сөйтіп, елордадан 35 шақы­рым жерде Арнасай демоалаңын құруға келістік. Осы жерде жасыл технологиялардың ең үздіктері жинақталады деп күтілуде», деп сөзін жалғады ол. Брифингте айтылған тағы бір жаңалық, биылдан бастап елі­міз­де жасыл технологияларға негізделген қазіргі заманғы жылы­жай­лар құрылысы басталады екен. «Қазақстанда «Жасыл көпір» серіктестік бағдарламасы іске асырылуда, ол жасыл техно­ло­гияларды трансферттеуді қарас­тырады. Осы бағдарлама бойын­ша коалиция бүгінде ресейлік әріптестерімен бірлесіп, екі техно­логияны ендірді. Ауыл шаруашылығы саласында жаңа технология жүзеге асырылуда. Сондай-ақ, бұрын-соңды елімізде болмаған күн био-вегетарий құрылысы қолға алынады. Бұл – аумағы 1200 шаршы метрді құрайтын қазіргі заманғы жылыжай», деді А.Сүлейменов. Атқарушы директор журна­листердің көкейінде жүрген бірқатар сұрақтарға да жауап берді. «Жасыл» экономиканың елімізде барынша дамытылып жатқанын назарға алып, Астанада өтетін ЭКСПО-2017 көрмесі жөнінде де әңгімеледі. Айтулы шараға еліміздің ғалымдары айрықша дайындалып жатқанын айтып, отандық өнертапқыштардың еңбегіне тоқталды. «Отандық әрбір рационализатор өзі ойлап тапқан дүниесін патенттеуге өте ұқыпты болуы тиіс. Оны заңдастырып алған соң шетелдік немесе отандық компа­нияларға сатуды меншік иесі өзі шешеді. Осы орайда айта кетер­лігі, өнертапқыштардың эконо­микаға, экологияға тиімді жаңа заттарын өз елімізде өндіруге отандық ком­паниялар да ынталы екенін айтқым келеді», деді ол. Коалицияның баспасөз қызметі таратқан ақпараттағы дерекке қарағанда, 2015 жылы «Жасыл» экономика үшін және G-Global-ды дамыту коалициясы бірнеше қонақ күту үйлерін салуды, ғимараттар мен тауарларға экомаркировка жасауды қолға алуды көздеп отырған көрінеді. Нұрбай ЕЛМҰРАТОВ, «Егемен Қазақстан».