Суретті түсірген – Ерлан ОМАР, «ЕQ»
Арнайы лицензиясы бар компания оқ-дәрілерді, қару-жарақ пен әскери техниканы, оларға арналған қосалқы бөлшектерді дайындап, сату, орнату, жөндеу, қызмет көрсету жұмыстарымен айналысады. Жобаға бүгінге дейін 2 млрд теңгеден астам қаржы жұмсалған.
«Компания бес жылдан бері әскери және азаматтық техникаға арналған дизельдік қозғалтқыш пен оның қосалқы бөлшектерін өндірумен айналысады. Негізгі тапсырыс беруші – Қорғаныс министрлігі. Мемлекеттік тапсырыс негізінде жұмыс істейміз. Сондай-ақ өнімімізді жақында Вьетнам еліне де экспорттауды қолға алмақпыз. Әзірге бірнеше дана двигатель ол жаққа дайындалып жатыр. Зауыттың өндірістік цехы тапсырыспен бір жылда шамамен 120 қозғалтқыш шығарады. Бізде мемлекет отандық өнімді қолдау мақсатында ауыл шаруашылығы машиналары немесе өзге де салалық өндіріске арналған техникалардың қозғалтқышына қатысты тапсырыс аясын кеңейтсе деген тілек бар. Ал тапсырыс көлемі ұлғайса, кәсіпорындағы өнім санын одан әрі ұлғайтуға әбден болады. Сондай-ақ жұмысшылардың да қатары көбейетіні анық», дейді компания директорының орынбасары Санжар Әбдірахманов.
Оның айтуынша, кәсіпорында білікті мамандар еңбек етеді. Олардың жұмысына қажетті құрылғылар мен жабдықтар жеткілікті. Арнайы қозғалтқышты сынауға арналған зертхана да жұмыс істеп тұр. Өндіріске керекті инфрақұрылымның барлығы тартылған.
«Қазір компанияда әкімшілік құрамнан бөлек, тәжірибелі 37 маман бар. Олар дизельдік қозғалтқыштың бөлшектерін құрастырумен, күрделі жөндеумен айналысады. Яғни ауыр салмақтағы танк пен жаяу әскерге арналған жауынгерлік машинасы, қысқаша «БМП» деп аталатын көлікке арналған қозғалтқыш шығарамыз. Негізгі шикізат – иінді білік пен поршень Ресейден келеді. Қалған бөлшектер, яғни өнімнің 60 пайызы өзімізде дайындалады», дейді өндірістік цехтың басшысы Талғат Жауғаштин.
Айтуынша, кәсіпорынның өндірістік-сынау кешеніне дизельдік қозғалтқыштардың сынағын жүргізуге аккредиттелген «Сынақ зертханасы» мәртебесі берілген. Жаңадан келген мамандарға тәжірибелі мотор құрастырушылар мен слесарьлар көрген-білгенін үйретіп, оқу-тәжірибеден өткізеді.
«Бір қозғалтқыштың барлық бөлшегі дайын болған жағдайда, оны құрастыруға 22 сағат беріледі. Бұл жұмысты екі маман бірлесе атқарады. Бірі – мотор құрастырушы, бірі – слесарь. Бұдан кейін құрастырылған қозғалтқышты зертханаға кіргізіп, арнайы сынаққа 10 сағат уақыт бөлінеді. Мұнда өнім толық компьютерлік диагностикадан өтеді. Осылайша, 32 сағатта бір қозғалтқыш дайын болады. Одан кейін қозғалтқышты тазалау, сырлау сияқты қосымша жұмыстар басталады», дейді.
Өндіріс орнында жастарды техникалық мамандыққа қызықтыру мақсатымен түрлі кездесу болып тұрады. Былтыр ғана Астана қаласының мектептерінен 9 және 11-сыныпты бітірушілер зауыт ішінде 2 айға жуық уақыт болып, арнайы тәжірибелік сабаққа қатысқан. Сол шәкірттердің көбі бүгінде техникалық мамандықты таңдап, колледж бен университетте білім алып жүр.
Айта кетейік, аумағы 4,2 гектар жерді алып жатқан кәсіпорын ішіндегі өндірістік цехтың өзі бірнеше бөлімге бөлінеді. Мұнда қоғалтқыштарды бөлшектеуге және ақауларды жоюға, монтаждауға, бөлшектерді жууға, тазалауға арналған арнайы аумақтар бар. Токарьлық жұмыстар мен дәнекерлеу, кесу, жону бөлмелері де бөлек-бөлек орналасқан. Арнайы қосалқы бөлшектер мен дайын өнімдер қоймасы да жасақталыпты. Жуырда зауыт басшылығы өндірістегі барлық жабдықты жаңаламақ.
