«Былтыр жалпы саны 25 спортшы қатысқан болса, биыл тек жастардың арасында 35 спортшы бар. Осы жастар және жасөспірімдер чемпионатында жалпы саны 75-ке жуық спортшы бақ сынап жатыр», деді Теңге ілу федерациясының атқарушы директоры Айбек Түркебай.
Жарыс нәтижесінде «Бес белес», «Қос құлаш» және «Жеті құт» стильдері бойынша жеңімпаздар анықталды. Атап айтсақ, «Бес белес» стилінде бірінші орынды Ұлағат Амангелді (Шымкент), екінші орынды Қанат Бақтыбай (Түркістан облысы) иеленсе, үшінші орынды Ерасыл Қоқанбай (Қызылорда облысы) мен Азат Әмірбеков (Шымкент) бөлісті.
Ал «Қос құлаш» стилінде Арнұр Шалхар (Түркістан облысы) жеңімпаз болды. Екінші орынды Нұрәлі Ерсін (Алматы облысы), үшінші орын иегерлері Дарын Мырзағали (Алматы қаласы) мен Руслан Сейдахмет (Қызылорда облысы) атанды.
Теңге ілуден «Қос құлаш» стилі бойынша екінші орын жеңімпазы атанған Алматы облысының спортшысы Нұрәлі Ерсін барлық спортшы жақсы дайындықпен келгенін, қарсыластарының да керемет өнер көрсеткенін алға тартты.
Сондай-ақ «Жеті құт» стилінде бірінші орынға Мейіржан Жұмаш (Шымкент қаласы), екінші орынға Ернұр Серікбай (Түркістан облысы) ие болса, үшінші орын Нұрислам Намазбай (Жамбыл облысы) мен Ерболсын Мақашевқа (Батыс Қазақстан облысы) бұйырды.
Еске салар болсақ, республикалық теңге ілу федерациясы Ұлттық спорт қауымдастығының құрамына кіреді. Қауымдастық құрамында бұдан өзге бәйге, көкпар, аударыспақ, жамбы ату, садақ ату, құсбегілік, асық ату, «Joryq» ат спорты және басқа да федерациялар бар.
Алматы облысы
