Найза ұшының екеуі де қоладан құйылған. Біреуінің ұзындығы 203 мм, жапырақ тәрізді сүйір ұшының ұзындығы – 111 мм. Ұзындығы 92 мм болатын ұңғысында ағаш саптың қалдықтары сақталған. Сыртынан қайыспен оралған.
Екінші найзаның ұшы жуандау – ұңғысының жиегі жұмырланған, жапырақ тәрізді сүйір ұшты. Ұштықтың ұзындығы – 224 мм. Ұңғысында шашақ байлауға арналған құлағы бар. Сапқа киілетін бөлігі құлақша арқылы өтетін қайыспен оралған. Мұның ұңғысында да ағаш сабының қалдығы бар.
«Халвай қорғанының қазба жұмыстарын 2009-2010 жылдардағы далалық маусымда Торғай археологиялық экспедициясы жүргізді. Бұл экспедицияға жергілікті археолог ғалым Андрей Логвин жетекшілік етті. Халвай қорғаны бірнеше қорған мен ескі қоныстан тұрады. Ескерткіш Қаратомар су қоймасының Тобыл саласының сол жағалауында, Бейімбет Майлин ауданындағы Халвай елді мекенінің солтүстік шығысына қарай 7 шақырымдай жерде орналасқан. Жартысына жуығын су шайып кеткен ескі қорғанды 2008 жылы жергілікті тұрғындар тапқан. Қорғанның аумағы 32 метр, биіктігі шамамен 1 метрдей болады. Қазба жұмыстары барысында қорғаннан 11 жерлеу орны табылды. Олар қайың және қарағай бөренелерімен жабылған. Жабынның астынан 7-8 жастағы баланың бейіті бар екен. Қорғандағы жерлеу құралдарының ішінде найза ұштарынан басқа да ыдыстар, қола пышақ, үш қола, тоғыз тас, төрт ағаш жебенің ұшы, қола айбалта, келсап табылды. Төбенің жабындысында иттің қаңқасы жатқан», дейді музей қызметкері Нәзима Оташева.
Қостанай облысы
