Қоғам • 11 Маусым, 2024

Қоғамға қауіп төндірмейді

22 рет
көрсетілді
4 мин
оқу үшін

Жүйке жүйесі сыр берген науқастарды қоғам қалай қабылдайды? Мүсіркемей қолдау көрсете ме, әлде үрке қарай ма? Дәрігерлер мен саланы зерделеп жүрген мамандар осы сауалдың жай-жапсарына үңілді.

Қоғамға қауіп төндірмейді

Фото: kerchtt.ru

Кездесуде «Gedeon richter kz» серік­тес­тігінің PR-ме­нед­жері Динара Бірмаған­бетова мен медиаме­неджер Назым Жанғазы ком­панияның бастамасымен Ас­тана, Алматыда жүргізген сауал­нама нәтижесін жария етті. Сауал­намаға ұзын-саны жүздеген адам қатысқан. Олар – шамамен 18 бен 65 жас шамасындағы қала тұрғындары. Осы тұрғындардың 13%-ы дерт туралы бұрын-соңды ес­ті­генмен, толыққанды хабары жоқ екен. Ал тұрғындардың 28%-ы шизофрения диагнозы қойылған науқастарды қоғамнан алшақтату керек деп санайды.

«Сауалнама нәтижесінде мұндай психикалық ауытқу­лармен бетпе-бет келмеген тұр­ғындар дерт туралы біле бермей­ді деген қорытынды жасауға болады. Оффлайн сауалнама қо­рытындысы шизофрения туралы ақпараттан бейхабар адам­дардың жас санатында ғана емес, тұрғылықты жері мен тіліне де айырмашылық барын көрсетті. Мысалы, Астана тұр­ғындарына қарағанда Алматы жұртшылығы бұл дерт туралы көбірек бі­ле­ді», дейді «Gedeon richter kz» PR-менеджері Динара Бір­ма­ған­бетова.

 Сауалнамаға қатысқан рес­понденттердің 87%-ы шизо­фре­нияның не екенін біле­ді, 48%-ы бұл аурумен ауы­ра­тын­дардың қоғамға қауіпті деп есептемейді. Сол секілді са­уал­намаға қатысқан тұрғын­дардың 67%-ы шизофрения диагнозы қойылған адамдарды оқшаулау қажет деген пікірмен мүлде келіспейді.

Басқосуда Астана қалалық қоғамдық денсаулық сақтау бас­қармасының штаттан тыс бас психиатры Елена Полиенко тәжірибесін бөлісіп, шизо­фре­нияға қатысты сауалдарға жауа­п берді.

«Елде 47 мыңға жуық адамға шизофрения диагнозы қо­йылған. Әрине, бұл – тұрақты бақылауды және ұзақмерзімді терапияны қажет ететін өте ауыр психикалық ауытқу. Бірақ қазіргі дамыған медицинада тәуір нәтижелерге қол жеткізуге болады. Кейбір пациенттердің жеке және әлеуметтік қызметін мүм­кіндігінше қалпына кел­тіріп, өмір сүру сапасын жақсарта алатын заманауи антипсихотикалық препараттар бар. Шизофренияға шалдыққан адамдардың кем дегенде үштен бірі дұрыс терапия­мен симптомдардың толық ремиссиясын сезінеді. Сондықтан шизофренияға шалдыққан адамдар қоғамға қауіп төндірмейді деп сеніммен айта аламыз», дейді Елена Полиенко сөзін түйіндеп.

Дүниежүзілік денсаулық сақтау ұйымының мәліметтері бойынша шизофрения шамамен 24 миллион адамға немесе дүние жүзінде 300 адамның біріне (0,32%) әсер етеді. Елі­мізде шизофренияның таралу деңгейі халықтың 0,6-0,7% және елдегі барлық пси­хикалық ауытқуы бар нау­қастардың 19%-ын құрайды.

Бұл жолы кездесуді ұйым­дастыруға «Niettes» платформасы мен «Gedeon richter kz» серіктестігі себепші болды. Аталған компания азаматтардың психикалық денсаулығына қамқорлық жасау ең маңызды бағыттарының бірі екенін еске салады. Атап айтқанда, «Gedeon Richter»-дің стратегиялық мақ­саты – осы сег­менттегі өнім ассор­тиментін кеңейту.

«Біз орталық жүйке жүйесі саласындағы түпнұсқа зерттеу­лерге ерекше көңіл бөлеміз. Өйт­кені компания Шығыс және Орталық Еуропадағы ең ірі био­химиялық өнімдерді әзірлеуге белсенді қатысады. Осылайша, біз шығаратын дәрілік өнім – бұл шизофренияның сандырақ немесе галлюцинация сияқты белгілерін ғана емес, сонымен бірге кең таралған кіші белгілері – апатияны, ангедонияны және мотивацияның төмендеуін ем­деу­де тиімділігі дәлелденген жалғыз антипсихотикалық дәрі», дейді «Gedeon richter kz» бас директоры Павел Хегай.

Мамандар шизофренияға шалдыққан әрбір науқасқа қолдау қажет деп санайды. Олар­дың қо­ғамнан алшақтап, назардан тыс қалмауына әрқайсымыз үлес қоса аламыз. Өйткені талай жылдан бері саланы зерттеп-зерделеп келе жатқан білікті дәрігерлер ши­зофрения диагнозы қойылған нау­қастардан қорқудың қажеті жоқ екенін ескертеді.

 

Жания Әбіл,

Л.Н.Гумилев атын­дағы Еуразия ұлттық универ­ситетінің 2-курс студенті

Соңғы жаңалықтар