Қоғам • 12 Маусым, 2024

Сезім себептері

45 рет
көрсетілді
2 мин
оқу үшін

«Құс табиғатына сай болуға ұшуы керек, балық жүзуі керек, ал адам сүюі керек. Сүюдің орнына қатыгездік танытса, адам құстың жүзгеніндей, балықтың ұшқанындай қисынсыз ғұмыр кешеді», дейді жазушы Лев Толстой.

Сезім себептері

Суретті түсірген – Ерлан ОМАР, «EQ»

Жақында Мәшһүр Жү­сіптің жиырма том­дығының бірінен «Махаббат туралы» деп жазылған риуаятты рисалаға көзім түсті. Ақын ғашық-мағшұқ арасындағы бейсаналы байланыс жайын сөз етіпті. Әуелі осы екі сөздің ара-жігін ажыратып алайық. Ғашық – түсінікті, ынтық, ынтызар жан. Ал мағұшық – әлгі ғашық назарының иесі. Жә, енді Мәшекеңе сөз бе­рейік:

«Махаббат оты әуелі мағшұққа түседі. Сонан тұтанып, ғашыққа тү­седі. Солай болғаны үшін шам өзі жа­нады. Сонан соң пәруананы күйдіреді. Шам неге бірінші жанады? «Мені көріп пәруана келер ме екен?» деп».

Апырай, мына тағылымның тамыры тым тереңде ғой. Баба сөзін байыптайық. Сонда сүйіктіңіз туралы әгараки жақсы ойласаңыз, ол міндетті түрде оны сезеді екен және сізге де сондай ілтипат көрсетеді. Бірақ бұл әрекетінің сырын өзі де ұқпауы мүмкін.

Осыдан барлық адам ара­сындағы қарым-қатынас құпиясы шешіліп сала беретіндей. Ішіміз жыли қоймайтын адамды көре қалсақ, оның да сөзі қатқылдау, жүзі суықтау көрінетіні содан болар. Бірақ ол жанмен тіл қатып, араласып көрмеуіміз мүмкін. Бар мәселе – ойда.

Көңіл терезесін әркім өзі тазартады. Бұл – пенделік мү­сі­ніңнен кісілік келбетің қашалатын рухани еңбек. Адам­дар тек өзін кемел­дендіруге күш жұмсаса, ай­наласы да соған сай жақсара береді. Ілгерідегі ізгілердің насихаты осыған саяды.

«Гүлді ойласаң – гүлстансың, тікенді ойласаң – тікендісің».

Ойыма Румидің осы ғақлиясы орала берді...