Коллажды жасаған – Зәуреш Смағұл, «ЕQ»
Облыстық балалар клиникалық ауруханасының ескі ғимараты күрделі жөндеуден өтіп, «Дәрігерлер үйі» деп аталып, жаңа ғимарат жас медицина мамандарына баспана етіп берілді. Тұрғын үй дәрігерлер арасында 12 медициналық ұйымға бөлініп, дәл осы үйден 94 жас маман қызметтік пәтер кілтін алды.
Жаңа баспана иелеріне үйлердің кілтін Денсаулық сақтау министрі Ақмарал Әлназарова мен облыс әкімі Ермағанбет Бөлекпаев табыстап, жаңа қоныстарына құтты болсын айтты.
– Кәсіби мереке қарсаңында осындай тамаша салтанатқа жиналдық. Мен кілт тапсыруға арнайы келдім. Бүгін біз денсаулық сақтау қызметкерлеріне қандай әлеуметтік қолдау көрсететінін көріп отырмыз. Көп мәселенің шешімін табуы облыс әкімдеріне байланысты. Сіздің аймақтарыңызда дәрігерлерге осындай қолдау көрсетілетіні қуантады. Жаңа пәтерлерге бақыт орнасын! – деді өзінің құттықтауында министр Ақмарал Әлназарова.
Суретті түсірген – Жангелді ӘБДІҒАЛЫМ
Сонымен қатар министр аймақта атқарылып жатқан игі бастамаларға да тоқтала өтіп, оған да оң баға берді. Әсіресе ауыл медицинасын дамыту үшін салынып жатқан 155 нысанға. Енді бір-екі жыл уақыт ішінде толық пайдалануға беріліп қалады.
Өңірде медицина саласы қызметкерлерінің жағдайын жақсарту әрі кадр тапшылығын шешу мақсатында жүзеге асып жатқан баспанамен қамту жұмысы әрі қарай да жалғаса береді. Баспана мәселесі шешілсе, кадр тапшылығы да жойылады. Сол себепті, дәрігерлерге жыл соңына дейін тағы баспана беріледі.
– Мемлекет басшысы Қасым-Жомарт Тоқаев медицина саласының қызметкерлеріне жағдай жасау керектігі жөнінде баса айтқан еді. Осы ретте биыл біз 220 пәтер береміз. Дәрігерлерді тұрғын үймен қамтамасыз ету жұмысы жалғасады. Сіздерге денсаулық және жаңа баспанада тек шаттық тілейміз! – деді аймақ басшысы.
«Дәрігерлер үйіндегі» пәтерлердің жартысы – бірбөлмелі, жартысы – екібөлмелі. Барлық үй жөндеуден өткізілген. Жиһазбен, қажетті тұрмыстық техникамен қамтылған.
Қызметтік пәтерге қол жеткізгендердің бірі – Умида Пазылова. Ол – қаланың Пришахтинск бөлігіндегі №2 емхананың жалпы практика дәрігері. Қарағандыға келіп, жұмыс істеп жатқанына екі жыл болыпты.
– Облыс әкімдігіне алғысымыз шексіз. Жолдасыммен, екі баламмен екі бөлмелі пәтер иесі атандық. Кадр жетіспеушілігіне байланысты Қарағанды облысына Түркістан облысынан шақыртумен келгенбіз. Жаңа пәтерге көшіп, енді алаңсыз еңбек етеміз, – дейді Умида Пазылова.
№3 көпсалалы аурухананың анестезиолог-реаниматологі Онласын Тоқаев пен «Jysan Med» емханасының онкологі Жазира Науқанова да жаңа баспанаға ие болғандарына қуанышты.
– Пәтерлер жайлы әрі жарық. 2023 жылдың қазанында отбасын құрып, пәтер жалдап тұрдық. Үйлі болсақ деген арманымыз бар еді. Әйтпесе, үй жалдап тұру жас мамандар үшін қымбатқа түседі. Енді, міне, қуанышымызда шек жоқ. Алаңсыз жұмыс істеуге мүмкіндігіміз бар. Тағы бір артықшылығы – қала орталығында орналасқандығы. Қаланың кез келген жеріне барып-келуге тиімді. Арманымызды жүзеге асырған мемлекеттік органдарға рахмет, – дейді О.Тоқаев.
Бұған дейін Бұқар жырау ауданы Доскей аулындағы жөндеуден өткен үйде 40 медицина қызметкері қызметтік тұрғын үйге қол жеткізген еді. Мұнымен қоса, биыл ауылға баратын медициналық қызметкерлер 8,5 млн теңгеден алады.
Қарағанды облысы
