Қ.Тоқаев Сеул Астананың Азия-Тынық мұхиты аймағындағы маңызды стратегиялық серіктестерінің бірі екенін айта келіп: «Корея сыртқы сауда айналымы бойынша төртінші орында және Қазақстанның ең ірі шетелдік инвесторларының ондығына кіреді. Оңтүстік Корея әлемдік ауқымда нағыз экономикалық және технологиялық локомотивке айналды», деп атап өтті.
«Қазақстанда Оңтүстік Корея капиталы бар 700-ден астам компания табысты жұмыс істейді. Елімізде 120 мың этностық корей маңызды рөл атқарады және біздің қарым-қатынасымызды нығайтуға баға жетпес үлес қосады. Өз кезегінде Кореяда оқитын мыңнан астам қазақстандық студент – елдеріміз арасындағы «достықтың алтын көпірі», деді Президент.
Сонымен қатар, келіссөздер барысында президенттер энергетика, инфрақұрылым және өнеркәсіп, машина жасау, сауда, көлік және логистика, цифрландыру және аэроғарыш салалары, қаржы секторы, білім, денсаулық сақтау және фармацевтика, туризм және мәдениет, экология және басқа да салалардағы екіжақты ынтымақтастықты талқылады.
Пайдалы қазбаларды бірлесе игеру тетігі
Оңтүстік Корея Президенті Юн Сок Ёль мен Қазақстан Президенті Қасым-Жомарт Тоқаев Астанада өткен келіссөздер барысында маңызды пайдалы қазбаларды барлау мен игеруде екіжақты ынтымақтастықты нығайтуға келісті.
Қазақстан мен Оңтүстік Корея екі ел арасындағы стратегиялық әріптестікті тереңдету бойынша Өзара түсіністік туралы меморандумға, сондай-ақ пайдалы қазбаларды жеткізу тізбегін құру туралы құжатқа қол қойды.
Қ.Тоқаев Қазақстан нарығына кіргісі келетін корей компанияларына қолайлы жағдай жасауға дайын екеніне назар аударды. Президенттің пікірінше, мұны жүзеге асырудың айқын жолдары бар. Үкіметаралық комиссия, Іскерлік кеңес пен бизнес қауымдастық арасындағы жұмыс тобы құрылған. Бұл құрылымдар екіжақты экономикалық байланысты нығайтуға зор септігін тигізеді.
Таза ауызсумен қамтылады
Қазақстан 2025 жылға қарай таза ауызсуға толық қолжетімділікті қамтамасыз етуге ұмтылады. Бұл туралы Қазақстан Премьер-министрі Олжас Бектенов мәлімдеді.
Мұндай мәлімдеме қалалық және ауылдық жерлерде сумен жабдықтау қызметтерін жақсарту мәселелерін талқылау барысында жасалды. Өткен жылдың қорытындысы бойынша сумен жабдықтау қызметтерімен Қазақстанда қала халқының 98,9%-ы және ауыл халқының 96,6%-ы қамтылды.
2024 жылы сумен жабдықтау және кәріз жүйелерін салуға, реконструкциялауға республикалық бюджеттен 218 млрд теңге көзделген. Бұл қомақты инвестиция Үкіметтің бүкіл ел бойынша су инфрақұрылымын жақсартуға деген ұмтылысын көрсетеді.
Өнімдер Түркияға қайта сатылады
Қазақстандық өнімді Түркия нарығына жеткізуге кедергі болған бірқатар шектеу алынып тасталды деп хабарлады Ауыл шаруашылығы министрлігінің баспасөз қызметі.
Әңгіме 2005, 2016 және 2022 жылдары түрлі аурулардың себептері бойынша енгізілген Қазақстаннан мал және құс шаруашылығы өнімдерін жеткізуге тыйым салу туралы болып отыр.
Бұл шешім осы жылдың мамырында Дүниежүзілік жануарлар денсаулығы ұйымының 91-сессиясында, екіжақты министрлікаралық келіссөздердің нәтижесінде қабылданды. Түрік тарабы Дүниежүзілік жануарлар денсаулығы ұйымының есептерінде ұсынылған ауруларды жою жөніндегі Қазақстанның жұмысын жоғары бағалады.
Мал шаруашылығы өнімдерін ілгерілетуге қойылатын ветеринарлық талаптар Ауыл шаруашылығы министрі Айдарбек Сапаровтың осы жылдың тамызында Түркияға сапары барысында талқыланады.
