Академияның хабарлауынша, Ғылым және жоғары білім министрінің 2022 жылғы 30 желтоқсандағы №223 бұйрығымен бекітілген Ұлттық ғылым академиясының академиктерін сайлау Қағидаларына сәйкес Академияның жалпы жиналысының шешімі шығарылды.
Аталған шешімге сай: «Өмір және денсаулық туралы» ғылымдар бөлімшесі («Медицина және денсаулық сақтау» бағыты) бойынша: Ақшолақов Серік Қуандықұлы мен Локшин Вячеслав Нотанович академик атанды. Осы орайда оқырмандарға түсінікті болу үшін су жаңа академиктерді қысқаша таныстыра кетейік. Серік Ақшолақов – белгілі нейрохирург, профессор, «Ұлттық нейрохирургия орталығы» акционерлік қоғамының басқарма төрағасы, Ғылым мен техника саласындағы мемлекеттік сыйлықтың иегері, бәрінен бұрын талай жанға екінші өмір сыйлаған дәрігер. Вячеслав Локшин – акушер-гинеколог, репродуктолог, профессор, еліміздің репродуктивті медицина саласындағы нормативтік және заңнамалық актілерін әзірлеуге елеулі үлес қосқанымен танымал.
Ал «Жер, ғарыш және коммуникациялар туралы» ғылымдар бөлімшесі («Жаратылыстану ғылымдары», «Инжиниринг және технологиялар» бағыттары) бойынша: Здоровец Максим Владимирович; Рамазанов Тілекқабыл Сәбитұлы; Сұраған Дөрбетхан; Тұрысбеков Ерлан Кеңесбекұлы Ұлттық ғылым академиясының академиктері болып сайланды. Максим Здоровец – Ядролық физика институты Астана филиалының директоры, физика-математика ғылымдарының кандидаты, профессор. Тілекқабыл Сәбитұлы – 80-нен аса ғылыми жарияланымның авторы, физика-математика ғылымының докторы, профессор, Қазақстандағы идеал емес плазма физикасы бойынша ғылыми мектептің негізін қалаушы. Сұраған Дөрбетхан – мемлекеттік сыйлық алған ең жас ғалым-математик, PhD доктор. Ерлан Кеңесбекұлы – биолог, профессор, «Үздік ғылыми қызметкер – 2022» иегері.
