Мереке тарихы ілгеріде жатыр. Деректерге сүйенсек, кеңестік кезеңде сауда, тұрмыстық қызмет көрсету және коммуналдық шаруашылық қызметкерлерінің күні болды. 1966 жылдан бастап шілде айының соңғы жексенбісінде аталып өткен. Ал 1988 жылы наурыздың үшінші жексенбісіне көшірілген. Тәуелсіз Қазақстан тарихында бұл кәсіби мереке Сауда және интеграция министрлігінен бұрын құрылған. 2017 жылы 31 қазанда Үкіметтің №689 қаулысымен шілденің соңғы демалысы – Сауда қызметкерлерінің күні болып белгіленген. Биыл кәсіби мереке 28 шілдеге сәйкес келіп отыр. Демек 2018 жылдан бері сала қызметкерлері мерекені 7-рет қатарынан атап өтпекші. Сондай-ақ бұл мереке ТМД елдерінде де бар. Мысалы, Беларусь пен Украинада шілденің соңғы жексенбісіне келеді.
Сауда – экономиканың маңызды саласы. Аталған сала мемлекет бюджетіне түсетін салықтың көп бөлігін қамтып отыр. Әрі жұмыссыздыққа тосқауыл қоюда да өте маңызды рөл атқарады. Сауда және интеграция министрлігі берген мәліметке сүйенсек, еліміздегі сауда саласында 1,5 миллионнан аса адам қызмет етеді. Сондай-ақ 80 мыңға жуық сауда нысаны бар. Бұның ішінде 700-ден астамы – түрлі сауда базарлары.
«2019 жылы құрылған Сауда және интеграция министрлігі 5 жыл ішінде ауқымды жетістіктерге қол жеткізді. Осы аралықта ішкі сауда айналым 60 пайызға артса, сыртқы тауар айналым 43 пайызға өсті. Тауарлар экспорты былтыр 35 пайызға ұлғайды. Сондай-ақ ұлттық сауда секторын дамытуда айтарлықтай жетістіктерге ие болдық. Ауқымды жұмыстар нәтижесінде ЕАЭО-ға мүше мемлекеттерде саладағы көптеген кедергі жойылды. Бұл халықаралық саудада мәртебемізді жоғарылатып, экономикалық байланыстарды кеңейтуге ықпал етті. 2019 жылдан бастап қазақстандық компаниялар экспорт арқылы Alibaba, Wildberries секілді халықаралық электрондық алаңдарға шыға бастады. Аталған бастама жаңа жұмыс орындарын көбейтіп, бүгінгі нарыққа шығуға мүмкіндік берді», дейді министрлікке қарасты Сауда комитетінің төрағасы Айдар Әбілдабеков.
Төрағаның сөзінше, еліміз Иран, Сингапур және Сербиямен маңызды еркін сауда келісімдерін жасаған. Бұл ел бойынша экспорттаушылар мен импорттаушылар үшін жаңа мүмкіндік туғызып отыр. Сондай-ақ Қытаймен сауда-экономикалық ынтымақтастық туралы келісімге қол қойылып, біздің еліміз әлемдегі жетекші экономикалық ойыншылардың бірімен қарым-қатынасымызды нығайтуға маңызды қадам басқанын баса айтқан жөн.
Сауда қызметкерлерінің мақсаты – халықтың тауарлар мен қызметтерге сұранысын қанағаттандыру. Расымен де, өмір сүру дағдымызды дүкендер мен басқа да сауда орындарынсыз елестету тым қиын. Адамзаттың түрлі қажеттілігін өтейтін нысандардың маңызы ерекше. Екіншіден, сауда кәсіпорындары жыл сайын дамып, заманауи технологиялық қызмет көрсету стандарттарын енгізіп жатыр. Өйткені тұтынушылардың да өнім мен қызмет көрсетуге қойылатын талаптары артқан.
Айта кетейік, кәсіби мерекеде сала қызметкерлерін министрлік және өзге де мемлекеттік құрылымдар құттықтайды. Жыл сайын оларды диплом және арнайы сыйлықпен марапаттап, құрмет көрсетіп келеді.
