Кемі бес бөтелке әкеліп тапсырған әр балаға балмұздақ берілді. Әсіресе, бүлдіршіндердің белсенділігі жоғары болды. Арнайы бөтелке қабылдау пункттеріне отбасымен келгендерде көп. Майқұдық саябағында бүлдіршіндер 50 мың бөтелке табыстап, 10 мың балмұздақ алыпты. Осы арқылы аулада шашылып жатқан бос бөтелкелер жиналып қалды.
Балаларға арналған мұндай акция аймағымыздың басқа қала-аудандарында жалғасты. Мәселен, Теміртаудың кішкентай тұрғындары 45 мың бөтелке жинап, 4 500 балмұздақ алды.
– Қала тұрғындары, әсіресе, балалар белсенді қатысты. Алдағы уақытта осындай акцияларды тұрақты негізде өткізуді жоспарлап отырмыз. Бір жағынан балаларға базарлық болса, екінші жағынан тазалыққа үлес қостық, – дейді Теміртау қаласы әкімінің орынбасары Самат Зияшев.
Мұндағы акцияға қатысқандар 10 бөтелкені балмұздақ алатын талонға ауыстырып отырды. Ал Шахтинскінің балалары 12 500 бөтелке тапсырыпты. Бұл жақтың бүлдіршіндері де аталған акцияға білек сыбана кіріскен көрінеді. Өздері мәре-сәре болып, мерекелік көңіл күй сезініпті. Аз ғана уақыттың ішінде қала тазарып қалды дейді ұйымдастырушылар. Қарқаралылықтар 4 500 бөтелке жинады. Саран қаласы, Ақтоғай және Абай аудандарының тұрғындары да есте ерекше қалатын тазалық эстафетасын жалғап әкетті. Олар да сәйкесінше 2 400, 3 000 және 2 000 бөтелке жинап тапсырған. Акция бастау алған бетте де Бұқар Жырау, Нұра және Шет аудандарының тұрғындары 2 500-ге жуық бөтелке жинаған.
Аймақ тұрғындары, әсіресе балалар пластмаст, шыны бөтелке жинау арқылы қалдықтарды қайта өңдеуге, осылайша өлкемізді таза ұстауға үлесін қосты. Бастысы, балалар экологиялық мәдениет дағдыларын үйренді.
Қарағанды облысы
