Өңделген алқаптардың жалпы көлемі 3,1 млн гектарды құраған. Бұл биыл болжанған 2,5 млн гектар көрсеткіштен 23%-ға жоғары. Болжамды көлемнің іс жүзінде асып кетуі жаңадан таралу ошағы анықталған жерлерді қайта өңдеуге байланысты орын алды.
Тұрақты мониторинг, дрондармен қоса техниканы зиянкестердің белсенді таралу орындарына жедел көшіру, орталық үкіметтік және өңірлік деңгейлердегі жағдайды қолмен басқару және бақылау, шекара маңы мемлекеттерінің аграрлық ведомстволарымен тығыз өзара іс-қимыл өз нәтижесін берді. Сондықтан биыл фермерлер егістіктері шегірткеден зардап шеккен жоқ. Негізгі қорғаныс іс-шараларының аяқталуына қарамастан, тағы бір апта бойы жекелеген өңірлерде шегірткенің пайда болуын бақылау бойынша жұмыс жүргізіледі.
Үкімет шегірткеге қарсы белсенді жұмыс кезеңін аяқтап, келесі жылға дайындықты бастайды. Биылғы жоспарда – шегірткенің таралу көлемі бойынша болжам жасау және өңірлерде фитосанитарлық инспекциялар пайдаланатын дернәсілдердің пайда болу орындарын мониторингтеу үшін 100 дрон сатып алу қарастырылған. 2025 жылы алқаптарды өңдеу үшін дрондар сатып алу жоспарланып жатыр.
Сондай-ақ келесі жылы пестицидтерге, оларды тасымалдауға, сақтауға және қолдануға арналған шығындарды қамтитын шегірткеге қарсы бірыңғай қызметті орталықтандырылған сатып алуға көшу көзделіп отыр. Бұл жерді өңдеудің сапасы мен тиімділігін бақылауға, орындаушылардың жауапкершілігін арттыруға және бизнестің сатып алуға қатысуын тартымды етуге мүмкіндік береді.
