Суреттерді түсірген – Жангелді ӘБДІҒАЛЫМ
«Таза орман» деп аталған акцияға еріктілер, спортшылар, «Жасыл ел» жасағының жас сарбаздары қатысты.
Шахтинск орман алқабының ауданы 722 гектарды құрайды. Бұл қала – тұрғындарының демалуға, спортпен шұғылдануға арналған сүйікті орны. Дегенмен өзінен қалған қалдықты тазалап жүру мәдениеті екінің біріне бұйырмағаны көбімізді қынжылтады.
Қала, оған жақын кент, ауыл жастарының бастамасымен орманға ағаш егу, қоқыс-қалдықтан тазарту жұмыстары бойынша акциялар жиі өтеді.
– Орман – дала байлығы. Бүгін жастарменен жалындап жүріп жап-жасыл аймағымызды тазарттық. Акцияның негізгі мақсаты да – сол. Ортаның табиғатқа деген жанашырлығын арттыру, – дейді Шахтинск қаласы Жастар ресурстық орталығы басшысының міндетін атқарушы Алексей Варзаев.
Шахтинск қаласында «Таза Қазақстан» акциясы басталғаннан бері 100-ден аса еңбек ұжымы мен 10 мыңға жуық тұрғын қатысты. 15 мың тоннадан аса қалдық сыртқа шығарылып, саябақ, алаң, ескерткіштер аумағы тазартылды. Мыңнан көп көшет егілді.
Қарағанды облысы,
Шахтинск қаласы
