«Жайлы мектеп» ұлттық жобасымен салынған елордадағы №103 мектепте министр Ғ.Бейсембаев білім саласы қызметкерлерін, ата-аналар мен оқушыларды жаңа оқу жылының басталуымен құттықтады.
– Қадірлі ұстаздар, ата-аналар және оқушылар! Бүгін 2024-2025 оқу жылының жаңа парағы ашылды. Еліміздің барлық өңірінде Білім күнін асыға күткен 3,9 млн бала сүйікті мектебімен, ұстаздарымен қайта қауышты. Мемлекет оқушылардың сапалы білім, саналы тәрбие алуы үшін барлық жағдайды жасап жатыр. Бүгін 90 мыңға жуық оқушы су жаңа мектептерде оқу жылын бастайды. Оның ішінде «Жайлы мектеп» ұлттық жобасымен салынғаны да бар. Ал 200 мыңнан аса бала күрделі жөндеуден өтіп, қайта жабдықталған мектептерде білім алады.
1 қыркүйек – алғаш рет мектеп табалдырығын аттаған балалар үшін ерекше мереке. Қымбатты балалар, оқу жылы сендерді жаңа жетістіктерге жетелеп шабыттандыратын қызықты, танымды әрі тағылымды болсын деп тілеймін! Дәл осы күні ұстаздардың өскелең ұрпаққа білім мен тәрбие берудегі орасан еңбегін де атап өткім келеді. Ұлтымыздың ағартушы ұлы тұлғасы Ахмет Байтұрсынұлы «Ұстаз – ұлт келбеті» деп бекер айтпаса керек. Сондықтан ағартушылық миссиясын адал атқарып жүрген ұстаздардың еңбегі лайықты түрде жоғары бағалануға тиіс. Құрметті әріптестер, өз мамандықтарыңызға адалдықтарыңыз, ұрпақ ісіндегі жанкешті еңбектеріңіз үшін алғысымды білдіремін. Сіздер балаларға білім беріп қана қоймай, оларға халқымыздың басты құндылықтарын сіңіріп келесіздер. Биылғы оқу жылы жоғары жетістіктер мен толағай табыстарға толы болсын! – деді Ғ.Бейсембаев.
Жалпы, жаңа оқу жылында елімізде 90 мыңға жуық оқушы жаңа 70 мектеп есігін айқара ашты. Оның ішінде 16 оқу ошағы – «Жайлы мектеп». Осы 16 «Жайлы мектептің» 9-ы Астанада орналасқан. Ал 200 мыңнан аса бала күрделі жөндеуден өтіп, қайта жабдықталған мектептерде білім алады. Еске салсақ, 2023–2025 жылдарға арналған «Жайлы мектеп» ұлттық жобасы аясында 401 мектеп салу жоспарланған. Министрліктің таратқан ақпаратына сүйенсек, бұл жоба оқушы орнының жетіспеушілігін шешуге, қала мен ауыл мектептері арасындағы алшақтықты азайтуға бағытталған. Жобада функционалды және қауіпсіз білім беру ортасын құруға ерекше назар аударылады. Бастауыш және жоғарғы сынып оқушылары үшін бөлек блоктар қарастырылған. Сондай-ақ техникалық құралдарды енгізу арқылы қауіпсіздік шараларын арттыру, ерекше білім беруді қажет ететін балалар үшін кедергісіз орта қалыптастыру, мектепті заманауи пәндік кабинеттермен жабдықтау талап етіледі. 2024–2025 оқу жылында барлығы 217 нысанның құрылысы жүріп жатыр.
Жалпы отандық мектептерде 3,9 млн оқушы білім алады. Биыл 352 мың бала алғаш рет мектеп табалдырығын аттады, ал 219 мың оқушы 11-сыныпқа көшті.
